quiroga / la voz

O pasado día 25 presentouse na igrexa da parroquia da Ermida o segundo volume da obra Tierras de Quiroga, escrita polo sacerdote e escritor Jesús Río Ramilo e dedicada á divulgación da historia da comarca. A primeira entrega desta publicación apareceu o pasado ano. Nese volume, Río Ramilo ocupouse do período comprendido entre os inicios da Idade Media e o principio do século XX. «Non comecei coas épocas castrexa e romana, porque xa hai moitas outras publicacións sobre elas, e preferín tratar outros períodos menos coñecidos», explica. O segundo tomo -subtitulado Sus gentes, productos y producciones- foi publicado co apoio dos tres concellos da comarca e céntrase na evolución demográfica e na historia das actividades económicas do territorio.

Jesús Río sinala que un dos principais obxectivos do seu libro é dar a coñecer aspectos pouco divulgados da historia local, como o feito de que en tempos pasados houbo unha importante produción de seda nas terras quiroguesas. «Isto é algo que coñece moi pouca xente, pero a seda que se manufacturou en Monforte a partir dos séculos XIV e XV era cultivada en boa parte na comarca de Quiroga», explica. Outra historia esquecida que aborda no seu traballo -engade- é o feito de que entre finais do século XIX e inicios do XX houbo varios intentos de explotar as areas auríferas do Sil. «É moi popular a historia das aureanas, que seguiron baldeando as areas do río ata que se construíron os encoros, pero estas tentativas industriais están moi esquecidas», comenta.

O libro fala tamén da minería do antimonio que se desenvolveu en Vilarbacú desde finais do século XIX. «Sobre a historia destas explotacións non había nada publicado ata agora», apunta o autor.

Fotografías inéditas

O segundo volume de Tierras de Quiroga, por outra parte, está ilustrado cun amplo número de fotografías que na súa maioría son inéditas. Boa parte destas imaxes foron cedidas a Jesús Río por varias familias da comarca e reflicten diversos aspectos da vida cotiá local, principalmente de mediados do século pasado. «Creo que é moi interesante recuperar estas fotografías porque na súa maior parte non son coñecidas máis que polas familias que as conservaron e mostran o modo de vida propio dunha época que aínda está cercana no tempo pero que é moi diferente da actual», sinala.

Unha parte deste material gráfico, procede da antiga revista Vida Gallega, publicada entre 1909 e 1938. Entre esas fotografías hai algunhas, datadas en 1920, que mostran como era o túnel romano de Montefurado antes de derrumbe que sufriu en novembro de 1934 e que reducíu a súa lonxitude desde os 120 metros ata os 52 que ten na actualidade. «Hai pouquísimas imaxes que mostren como era o túnel antes de derrumbarse e as que se conservan teñen un valor histórico moi importante», sinala Río.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
2 votos
Comentarios

Imaxes e historias antigas da comarca de Quiroga