Mámoas visitables e outras que poden selo

Francisco Albo
francisco Albo MONFORTE / LA VOZ

LEMOS

No sur lucense só hai catro xacementos megalíticos que se aproveitan para o turismo ou para iniciativas educativas

08 nov 2016 . Actualizado a las 13:42 h.

Hai agora un ano foi limpado e sinalizado o conxunto de túmulos megalíticos situado entre as parroquias de Piñeiró e Abuíme, no municipio do Saviñao, nunha iniciativa impulsada polo colectivo Á Luz das Mámoas. Este lugar é agora un dos poucos xacementos arqueolóxicos deste tipo de todo o sur lucense que foi acondicionado para recibir visitas. Con anterioridade á mencionada iniciativa, son moi contados os casos de xacementos megalíticos na zona que fosen sinalizados ou aproveitados dalgún modo para actividades turísticas e educativas. As únicas excepcións son a necrópole de Santa Mariña -no límite entre os municipios do Incio, Samos e Sarria- e os dolmes de Abuíme e Leira Rapada, tamén no Saviñao.

No amplo patrimonio megalítico deste territorio -con cerca de 150 lugares catalogados- hai outros elementos que poderían ser desbrozados e sinalizados como os túmulos de Piñeiró. O arqueólogo Xabier Moure, que realizou un extenso inventario deste patrimonio, indica que moitas mámoas da zona son pouco aproveitables neste aspecto por acharse en lugares de difícil de acceso, por estar mal conservadas ou por ofrecer moi pouca visibilidade. Pero no caso doutros xacementos que se encontran en mellor estado e que están en zonas facilmente accesibles ou de especial valor paisaxístico, cre que sería interesante retirar a maleza que os cubre e marcalos con sinais. Estas son as súas suxestións.

O Saviñao. Ademais dos lugares xa mencionados, neste municipio encóntrase o chamado Campo das Mámoas, unha penichaira situada a 670 metros de altura xunto á estrada LU-P5804, perto dun cruzamento que leva á aldea da Broza. Os túmulos megalíticos que forman conxunto son moi visibles.