Os desfiles de Monforte e Chantada celebráronse nun ambiente multitudinario, favorecido pola ausencia das chuvias e unhas temperaturas moderadas
06 feb 2008 . Actualizado a las 02:00 h.Aínda que o tempo non presentaba moi boa cara onte pola mañá, os pronósticos meteorolóxicos cumpríronse e as precipitacións limitáronse a algún chuvasco breve e sen importancia. Non sucedeu o que algúns temían -que a chuvia e o vento obrigasen a suspender a última hora os actos festivos, como ocorreu en Sarria o pasado domingo- e os tradicionais desfiles de comparsas do Martes de Entroido puideron celebrarse sen contratempos en Monforte e Chantada. O tempo mostrouse incluso bastante temperado para esta época do ano, o que sen dúbida animou aos veciños a saír á rúa para presenciar os desfiles.
En Monforte, o público foi o máis numeroso que se viu nos desfiles dos últimos anos, a pesar de que os participantes foron menos que noutras ocasións, debido principalmente á ausencia de dúas comparsas de Sarria e de Samos que suman cerca de duascentas persoas e que este ano non puideron acudir á convocatoria. Aínda así, o desfile congregou a máis dun millar de participantes, repartidos en 31 comparsas de diversos tamaños, desde catro ou cinco ata máis de noventa membros. Os motivos de inspiración foron do máis variado: desde vellas series televisivas de debuxos animados ata o recente o enfrontamento entre a cúpula eclesiástica e o Goberno central ou a supresión da tarifa eléctrica nocturna. Pero como noutras ocasións, a elaboración dos propios disfraces primou sobre a presenza dos traxes e pezas de alugueiro.