O Día Internacional da Terra

Unha das maiores preocupacións de Gobernos e cidadáns en todo o mundo ten que ver co impacto das nosas actividades sobre a natureza. Vivimos nun fogar común co resto dos seres vivos, a Terra, un lugar que nos proporciona todo o que necesitamos, pero é preciso buscar un equilibrio entre o uso dos recursos e a conservación do medio ambiente para garantir o sustento das xeracións futuras.

A Organización de Nacións Unidas decidiu, no ano 2009, celebrar cada 22 de abril o Día Internacional da Nai Terra (unha expresión utilizada en moitos países), en recoñecemento da necesidade de concienciar sobre a importancia de coñecer o planeta e protexelo, e a todos os seus habitantes. Para iso invita anualmente a todos os países, rexións, organizacións non gobernamentais e á sociedade en xeral a celebrar o Día da Terra e emprender iniciativas relacionadas con este tema.

Antes desta resolución da ONU, algúns países xa tiñan esta data no seu calendario, coordinados por organizacións con influencia global como a Rede Día da Terra (EDN, polas súas siglas en inglés). A EDN programa cada ano unha campaña cun obxectivo concreto, e o que propón no 2018 é acabar coa contaminación provocada por plásticos. Estes materiais, cada vez máis presentes nas nosas vidas, teñen o seu impacto máis sensible sobre o medio mariño e as especies que o habitan, pero tamén algúns dos compostos que conteñen os plásticos poden afectar ao funcionamento das hormonas nos seres humanos e outros animais.

O noso estilo de vida actual xera unha gran cantidade de lixo plástico, derivado, entre outras cousas, de numerosos obxectos refugables, como botellas, bastonciños de algodón, cueiros, envases de alimentos e outros produtos domésticos. Cada ano úsanse en todo o mundo 500.000 millóns de bolsas de plástico e cómpranse un millón de botellas deste material por minuto, por poñer algúns números.

Campañas como a do Día da Terra buscan concienciar á poboación sobre a necesidade de reducir o consumo de obxectos de plástico, así como de reutilizar e reciclar. Tamén se insta aos Gobernos e á industria a apostar pola procura de materiais biodegradables que substitúan aos plásticos actuais, a maioría fabricados a partir de derivados do petróleo.

 

O mar como vertedoiro

A expedición científica Malaspina percorreu os océanos de todo o mundo entre os anos 2010 e 2011 recollendo máis de 3.000 mostras a diferentes profundidades para estudar o impacto do cambio climático na vida mariña. Ao analizar as mostras atopáronse cunha sorpresa, e é que en todas elas aparecían restos de plástico. Cos datos recolleitos realizaron un mapa da contaminación por plástico na superficie do mar e, aínda que o atoparon en todos os lugares que visitaron, identificaron cinco grandes zonas onde se concentraban nos océanos Pacífico, Atlántico e Índico. As localizacións destas acumulacións de residuos plásticos coinciden cos chamados xiros subtropicais, grandes correntes de auga circulares que transportan os refugallos que van recollendo das costas.

Calcúlase que chegan anualmente polo menos oito millóns de toneladas de plástico aos océanos, un medio no que supoñen un risco para moitos animais que poden enredarse nestes desproveitos. Tamén poden ser inxeridos, como ocorre en ocasións coas tartarugas, que poden confundir as bolsas de plástico coas medusas das que se alimentan. Ademais, o plástico degrádase lentamente e vanse formando pequenas partículas que acaban no interior dos peixes e invertebrados, ingresando así na cadea trófica.

Actividades 

Calcula a túa pegada. Botellas, bolsas, envoltorios de alimentos, cepillos de dentes, cubertos... A lista de obxectos cotiáns que usamos de forma máis ou menos habitual é moi longa. Podes calcular o teu consumo na ferramenta en liña dispoñible na páxina de Earth Day Network (EDN). Poderías reducir o uso dalgúns deses obxectos de plástico?

https://www.earthday.org/plastic-calculator/

«Mar de plástico». O Aquarium Finisterrae da Coruña exhibe unha exposición que pretende concienciar aos cidadáns sobre o gran problema ecolóxico, ambiental e socioeconómico que supón o lixo plástico mariño. «Mar de plástico» contén 85 obras artísticas realizadas con materiais recuperados como lixo nas praias galegas. Foron creadas coa colaboración da asociación Mar de Fábula e o colectivo RetoqueRetro.

http://es.mc2coruna.org/2018/01/mar-de-plastico.html

Voluntarios contra a contaminación mariña. Mar de Fábula é unha asociación sen ánimo de lucro dedicada á conservación do océano. Os seus voluntarios levan a cabo actividades de limpeza de praias e sensibilización pública sobre o problema ecolóxico que supón o lixo mariño. Podes coñecer as súas numerosas iniciativas na súa páxina web:

http://www.mardefabula.org/