Os ingredientes fundamentais dos veráns de Antonio Durán, Morris, teñen que ter tranquilidade e boa música
07 ago 2015 . Actualizado a las 05:00 h.Galicia como destino estival, elección de moitos, incluso de galegos tan senlleiros coma Antonio Durán, Morris. Tranquilidade e boa música son os ingredientes fundamentais dos seus estíos.
-¿Quen escribe o guión dos seus veráns?
-Eu mesmo e o tempo.
-Se tivese que vivir estes meses coma un dos seus personaxes, ¿por cal se decantaría?
-Non creo que me identificase con ningún deles. Os meus personaxes adoitan ser moi inquietos. Eu, pola contra, intento vivir dun xeito máis calmado.
-¿Cal é o itinerario das súas vacacións?
-Normalmente quedo en Galicia e viaxo por aquí. Gusto das Rías Baixas, de pasear pola cidade e de apuntarme ao terraceo.
-Entón, ¿mellor sol e praia en vez de escenarios e focos?
-Depende, se o escenario e os focos son bos, benvidos sexan. Con todo, a min adóitame coincidir estar parado nestes meses polo que opto por gozar da praia, do mar e tamén, de cando en cando, da casa.
-¿Pratos combinados ou alta cociña?
-Os pratos combinados gústanme ben. Con todo, inclínome pola alta cociña, aínda que non son consumidor habitual.
-Un albariño en man e de fondo...
-Eric Burdon, de The Animals.
-Unha troula, ¿onde e con quen?
-Cos meus amigos máis íntimos, nas Cíes e coas estrelas da noite, agardando a que chegue o amencer.
- E de ter a oportunidade de instaurar unha festa, ¿como e cando sería?
-Sen ter que poñerlles un nome especial, unha de benvida e outra de despedida do verán.