Orzamentos 2020: Unha normalidade excepcional


En tempos de política de regate curto, algarada e movemento a golpe de enquisa, un goberno que ten o atrevemento de presentar un Orzamento en tempo e forma case corre o risco de ser tachado de excéntrico e anacrónico. Aínda así, en Galicia temos a sorte de ter unha Xunta que segue crendo que a política é unha actividade destinada a mellorar a vida da xente e non a cultivar as vaidades das persoas que encabezan os partidos.

Nun momento de inseguridade e volatilidade económica, estas contas representan certezas e unha aposta polo crecemento: máis investimento, récord histórico en gasto social, mellora das condicións dos empregados públicos e pulo á cultura e á preparación do Xacobeo 2021. Pero tamén significan menos débeda e menos impostos, porque Galicia segue a ser a comunidade referencia de toda España en rigor na xestión das contas públicas e, tralas novas reducións na carga fiscal, podemos asegurar que na década do presidente Feijoo á fronte do Goberno autonómico os galegos aforraron 1.500 millóns de euros, que quedaron nos petos das familias e os traballadores.

Esta realidade, a dunha Xunta preocupada pola economía, o emprego, os servizos públicos e a sanidade, contrasta co día a día dunha esquerda ocupada unicamente en crearlle novos problemas á sociedade e reabrir debates pasados co obxectivo de camuflar a súa incapacidade para afrontar os desafíos do futuro. A maior expresión desta realidade é un Pedro Sánchez absolutamente despreocupado de Galicia, que vai a novo agravio por semana coa nosa terra, e que leva anos sendo o fío condutor da parálise e o bloqueo que vive o país.

Por todo isto, unhas contas coma as que presentou a Xunta son unha normalidade excepcional. O que debería ser habitual na xestión pública é hoxe un caso extraordinario, que nos converte en modelo a seguir para gobernos autonómicos, sexa cal sexa a súa cor.

Hoxe non hai mellor desexo para España ca que a súa política e o seu Goberno se parezan o máis posible aos de Galicia.

Por Miguel Tellado Secretario xeral do PPdeG

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
1 votos
Comentarios

Orzamentos 2020: Unha normalidade excepcional