Susana López Abella: «Moitas veces a violencia está normalizada e non se recoñece»

A secretaria xeral de Igualdade destaca que Galicia é un referente ao aumentar ano a ano as axudas ás vítimas


Redacción / La voz

Desde a secretaría xeral da Igualdade da Xunta, Susana López Abella dedica unha parte importante dos seus esforzos a loitar contra a violencia machista.

-As cifras do 2018 reflicten unha baixada de denuncias.

-Efectivamente, houbo unha lixeira baixada dun 4,7 %. Desde as Administracións consideramos que é importante que se denuncie para que se poida actuar, o que pasa é que as diferenzas son moi pequenas. O que temos é que traballar para que as mulleres denuncien, e que denuncien coa seguridade de que o seu proceso vai ter un bo termo. Por iso teñen que estar preparadas e estar atendidas, e nese traballo estamos, tratando de que coñezan todos os recursos que teñen á súa disposición e que poñemos en marcha grazas tamén ao desenvolvemento do Pacto de Estado. Desde o ano 2009 ata o 2018 temos só en axudas económicas concedidas a mulleres vítimas de violencia de xénero un total de 3.482 beneficiarias. A violencia de xénero segue na nosa sociedade e temos que traballar con todos os nosos medios.

-Falaba de que as mulleres teñen que estar informadas, pero tamén é importante a súa independencia económica.

-Si. En Galicia somos referentes porque desde que se aprobou a lei autonómica contra a violencia de xénero no ano 2007 habilitáronse unha serie de axudas con fondos propios, e fomos incrementando ano tras ano as axudas periódicas para as vítimas -e, por certo, acaba de publicarse a orde de convocatoria, que sae por un importe de 5,1 millóns de euros, o máis alto da historia-. Tamén acabamos de chegar a un acordo no Parlamento de Galicia para incrementar o teito para percibir estas axudas. E contamos con outros programas, como un que para nós é importantísimo e que esperamos non ter que utilizar máis, que é o de apoio a persoas orfas.

-Van poñer en marcha un plan de inserción laboral nos concellos.

-Un programa do que nos sentimos especialmente orgullosos, que agora se vai ampliar para os concellos e que se está a desenvolver desde o ano 2016 é o de inserción laboral dirixido a mulleres en situación de violencia de xénero. Ata o momento teñen participado 835 mulleres e acadaron a súa inserción laboral 159. Pode parecer cativo, pero non o é, porque a maior parte das mulleres que participaron neste programa atópanse despois en mellor situación para lograr unha inserción laboral ca cando iniciaron ese programa. É máis que a busca de emprego, pois a violencia de xénero é tan tráxica que esnaquiza ás mulleres, e este programa trata de recompoñelas.

-Din as estatísticas que cada vez hai máis casos de violencia entre menores e polas redes.

-Estamos traballando neste tema xa desde hai anos, ofrecendo talleres e accións formativas sobre o bo uso e os perigos das redes sociais. As redes sociais son boas, pero se son ben utilizadas.

-Están as mulleres máis desprotexidas nas áreas rurais?

-Levamos anos traballando e imos facer unha macroenquisa para coñecer a situación da muller, con especial fincapé no ámbito rural e das mulleres maiores. Tamén temos colaboración coas federacións de mulleres rurais e cos colectivos veciñais. É certo que moitas veces a violencia de xénero está normalizada e non se recoñece, e estamos traballando en varias vertentes nese ámbito.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Comentarios

Susana López Abella: «Moitas veces a violencia está normalizada e non se recoñece»