Otero di que Facenda xustifica os recortes en que a economía empeorou dende o verán
23 dic 2012 . Actualizado a las 06:00 h.O responsable de Función Pública de Comisións Obreiras (CC. OO.), Ramiro Otero, incide na perda de capacidade adquisitiva dos empregados públicos da Xunta, e reclama medidas de axuste de carácter fiscal, que penalicen tamén aos bancos e non só aos traballadores.
-¿Séntense enganados os empregados da Administración autonómica?
-Feijoo dixera que non ía tocar aos empregados públicos. Non se trata só deste recorte do 4 %, senón de que se suma aos que nos aplicaron dende o 2010. Isto terá unha consecuencia clara sobre o consumo. Hai outras formas.
-¿Cales son as súas propostas?
-Non se pode actuar sempre sobre os gastos e non tocar os impostos. Hai que tomar medidas na banca, na imposición do IBI á igrexa. Por aí hai que ir, e non sempre sobre os traballadores.
-¿Qué explicacións lles da Facenda de portas a dentro sobre os axustes?
-A súa xustificación é que, dende o verán, a economía deste país foi empeorando. Eles mesmos recoñecen que as súas políticas son equivocadas. O problema é o engano absoluto. Hoxe a Xunta di unha cousa e mañá outra. Non nos aportan ningunha documentación. Dende o noso sindicato queremos plantexar respostas contundentes.