Con pasaporte galego


Hai duas clases de viaxeiros: os que van polo mundo provistos de pluma, caderno, magnetófono ou cámara de televisión e os que simplemente van, miran e senten, sen ocuparse de compartilo con nós. Está claro que Luis Menéndez pertence ao primeiro grupo. Teno demostrado ao longo dos anos, sobre todo cos seus programas de TV, e demóstrao dun xeito especial no libro que acaba de publicar: Galleira Passport. Crónicas viaxeiras do século XXI. Os libros de viaxes son moi variados e acóllense a moitas definicións, pero eu quero referirme aquí só a unha característica que os diferenza: os que están escritos desde unha perspectiva concreta, declarada, e os que conteñen descripcións xerais sen cosmovisións definidas. No caso de Menéndez non hai ningunha dúbida: el é un viaxeiro que olla desde e para Galleira (Galicia en barallete) e que vai buscando o que nos é común ou comparte algunha raigame con nós. É a súa, pois, unha mirada condicionada por unha cosmovisión propia, que define aquilo que máis nos interesa. E esta cosmovisión, está claro, é a galega, esa forma nosa de ver o mundo e de recoñecérnonos coma parte del. Cita Menéndez ao comezo unha frase de Ryszard Kapuscinski: «A persoa que deixa de asombrarse está baleira». E así é. Coñecín ao xornalista polaco e oínlle reflexións sobre episodios e viaxes dos que informou. Kapuscinski intentaba sempre ofrecer unha versión obxectiva que servise para ilustrar por igual a todos os cidadáns do mundo. Mais, ben sabía cal era a realidade resultante: que el informaba a persoas culturalmente occidentais e que o xornalismo da suprema obxectividade (propósito irrenunciable) era algo so ocasionalmente alcanzable. Porque un é de onde é. E Luis Menéndez, sen deixar de aspirar a esa obxectividade, tamén é de onde é, e conta as cousas para os seus, é dicir, para nós. O logro esencial dun bo libro de viaxes é acurtar as distancias entre uns seres humanos e outros. O seu obxectivo é facilitar os coñecementos e mesmo engaiolarnos con eles. E nisto atinou o neodescubridor Menéndez, porque Galleira Passport é un libro que nos leva por tres travesías vencelladas con nós: a lusa (Mozambique, Angola, Brasil?), a celta (Irlanda, Escocia, Gales?) e a oriental (desde as repúblicas bálticas a Chipre). Toda unha diversidade que se unifica na ollada dos cidadáns de Galleira.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos

Con pasaporte galego