Soñamos máis de corenta minutos con gañar en Badalona, pero ao final non puido ser.
Tempo despois da Copa, presentámonos a esta minixira polo nordeste peninsular coa baixa de Jankovic. E coa alta, e incluso quecemento, de Agustín Ubal, prometedor xogador do Barça que semella que virá a Lugo na busca de presenza en ACB. Bo físico, boa carta de presentación con a selección charrúa... Que sexa unha próspera relación a nosa.
O encontro foi tan igualado que chegamos á prórroga, con continuas tentativas de deixarnos atrás no marcador, e o Breogán agarrándose ao encontro, tal e como nos ten acostumados, si, pero que dureza mental para aguantar 40 minutos así. Forzou a prórroga o pegamento deste equipo, Rasid Mahalbasic, nunha actuación xenial do balcánico.
Neste tempo engadido competimos, pero as nosas virtudes non chegaron para tapar as carencias propias e ao empuxe do equipo rival, un dos poucos que gañou no Pazo e claro candidato ao playoff.
Parciais importantes de final de cuarto en contra, un Pau Ribas co que soñaremos esta noite, baixo acerto no tiro de 3 e excesivas perdas seguramente foran os nosos principais puntos febles nesta noite. Tamén poderiamos sumar as faltas evitables de Jordan Sakho, que o levaron ao banco rapidamente, se ben na segunda parte estivo moito máis entoado. No lado positivo, vimos momentos de baloncesto ofensivo moi fermosos e un equipo que segue mantendo as súas sinais de identidade intactas. E con iso hai que quedar.
Próxima estación: Andorra. Agardemos non pagar o esforzo de hoxe, que todos estean en plenas condicións e tratar de traer algo positivo desta longa fin de semana.