«O instituto mudou coa cidade»


ferrol / la voz

Ana Romero Masiá, que foi directora do instituto Sofía Casanova dende principios dos 80 ata finais da mesma década, encargouse onte de impartir unha conferencia para clausurar os actos de celebración do 50 aniversario do centro. Actualmente dirixe o instituto Monte das Moas, en A Coruña, pero garda moi bo recordo do seu paso por Ferrol.

-¿Que lembranzas garda?

-Eran anos nos que o instituto transformábase ao mesmo ritmo que a cidade. Eran días de reconversión industrial, de cambios lexislativos na educación e foi xustamente mentres eu estaba na dirección cando o centro viviu varias transformacións. Cambiouselle o nome e mudaron as súas bases, xa que era soamente feminino e pasou a ser mixto.

-¿Poderíase dicir que traballaban dentro dun contexto social complicado?

-Os cidadáns estábamos en total ebulición en todos os ámbitos da vida, tanto no traballo como na participación dos pais e as nais nas reunións do instituto. Os consellos escolares daquela parecían unha especie de ensaios dos comités de empresa, porque claro, Ferrol era unha cidade moi posicionada con dous colectivos moi marcados naquel momento e, como consecuencia disto, tiñamos uns consellos moi moi tensos, algo que agora non ocorre, polo menos no centro no que estou agora e penso que en ningún outro nestes momentos, menos mal.

-¿Foi traumático ese paso de feminino a mixto?

-Así como no tema do nome houbo bastante unanimidade entre o profesorado xa que críamos que que o nome antigo, Camilo Alonso Vega, non era o adecuado para un centro de ensino, no cambio de feminino a mixto houbo moitas e grandes diferenzas entre os profesores aínda que ao final a maioría tomou a decisión de seguir adiante. Non poido dicir que foi unha transición traumática pero sí que recordo discusións.

-¿É máis difícil dirixir un centro hoxe en día ou nos oitenta?

-Aparecen problemas diferentes, agora os centros están moito máis democratizados e dispoñen de certa autonomía para xestionar os seus recursos, que isto era un problema moi grave que tiñamos nos 80. Daquela había que xustificar as partidas tal e como viñan dadas de Madrid e entón estabas obrigado a pedir facturas falsas porque gastabas moito en calefacción e tiñas que xustificalo en papel hixiénico, por exemplo. Agora é máis cómodo organizar un instituto pero por outro lado temos a Administración actual que recorta os presupostos en educación cando ten a ocasión.

-E con respecto ao alumnado, ¿cambiou?

-Os alumnos estudan cada vez menos. Estamos nunha sociedade que inculca outros valores e na que a filosofía do esforzo e o premio a quen traballa estanse a devaluar. Isto tradúcese en dificultades para convencer aos rapaces de que teñen que obter un título de secundaria ou, aos que fan bacherelato, que teñen que seguir cos seus estudos.

Conoce nuestra newsletter con toda la actualidad de Ferrol

Hemos creado para ti una selección de noticias de la ciudad y su área metropolitana para que las recibas en tu correo electrónico. Descubre nuestro nuevo servicio.

Votación
3 votos

«O instituto mudou coa cidade»