«O indispensable nas mascotas é a hixiene moito máis que a estética»

Levar os animais de compañía ás perruquerías óllase agora como unha práctica normal


lalín / la voz

Mudaron os tempos, e moito, nisto de levar as mascotas ás perruquerías caninas avanza Rocío Couto Feijoó (Donramiro-Lalín) ao comezo da entrevista. E do tema sabe bastante. Con doce anos de experiencia laboral ás costas lembra aínda aqueles pasos reticentes de donos de cans «que tiñan moitos reparos a que os viran entrar á perruquería».

-Pero entendo que se comezou a funcionar a perruquería canina sería pola demanda?

-Claro. Demanda había pero era unha novidade todo isto doce anos atrás e pensábase que era algo elitista como pasaba tamén coa clínica e con levar as mascotas ao veterinario, e mesmo había certo reparos de que te viran ir á perruquería co teu can. Iso xa non pasa.

-Temos claro os servizos que se prestan nunha perruquería canina?

-Poden existir algunhas dúbidas. Estamos para proporcionar coidados hixiénicos e estéticos ás mascotas. O primeiro e o indispensable nas mascotas é a hixiene e a limpeza moito máis que a estética.

-Dende o punto de vista pois da hixiene e limpeza, ¿con que periodicidade se deben bañar os cans?

-Como norma xeral podemos falar dun baño ao mes pero vai variar segundo o animal, o tamaño do mesmo... Bañalos máis dunha vez ao mes non é moi recomendable xa que se lle elimina a graxa protectora da pel. Os cans que mudan o pelo, por exemplo, hai que axudarlles con cepillados frecuentes á marxe dos baños. Aqueles que teñen nós tamén é preciso quitarllos, non é o mesmo un can que viva nun piso que aquel que está nunha finca ou no xardín... Logo está a necesidade de cortarlles as uñas para que non se lle craven nas almohadillas... Se o animal sae e está chovendo cunha boa limpeza de patas sería suficiente... O que non se pode obviar é que hai que cepillalos sempre ben xa que se elimina boa parte da sucidade que ten o animal.

-Para os cachorros exactamente a mesma práctica?

-Efectivamente. Sempre lle comento aos clientes que pensen que os cachorros son coma bebés; que precisan de baño, auga quentiña e calor. É certo que hai unha lenda urbana que di que os cachorros non deben de lavarse ata certa idade pero é mentira precisan do baño coma os bebés. Ningún pai deixaría un bebé sin lavar varios meses (risas); pois os cachorriños tampouco. É importante secalos ben despois dun baño quentiño para que non lles baixe a temperatura corporal.

-Cales son as pautas básicas de hixiene nun can?

-Primeiro o cepillado antes do baño con auga quente e xabón ou champú para cans, que os hai de todo tipo, e logo un bo secado con toalla e secador. Canto máis seco quede mellor xa que a tendencia do can é a rebozarse logo en terra, por exemplo, ao querer impregnarse dun olor máis forte que do xabón ou champú co que os lavamos.

-Cans que participan en competicións de beleza pasan tamén pola súa perruquería?

-Non. A clientela é variada, procedente de todos os concellos da comarca de Deza e de Antas de Ulla, pero non teño ningunha con animais en concursos de beleza.

-Revistas especializadas amosan tintes especiais para mascotas ou pinta uñas, ¿pedíronlle algo disto?

-Teño constancia efectivamente de tintes especiais para cans e tamén dos pinta uñas pero aquí ninguén me pediu nada desas características.

-É certo que atende coellos?

-Si. Son coellos enanos con pelo largo que hai que cortarlle ao igual que as uñas.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Comentarios

«O indispensable nas mascotas é a hixiene moito máis que a estética»