Llerena Perozo e Andrés Duro promoven en Trasfontao un proxecto que da outra vida ao rural con iniciativas literarias, artísticas e escénicas
04 jul 2021 . Actualizado a las 05:00 h.Llerena Perozo e Andrés Duro deixaron atrás a cidade para comezar unha nova vida no rural. Decidiron trocar a axitación urbá de Santiago de Compostela pola tranquilidade da comarca do Deza, máis concretamente do municipio de Silleda. Instaláronse na finca da Gargalleira, xa que -conta Llerena- «Andrés busbaba volver ao rural, atopou a Gargalleira e quedou namorado».
Na súa finca de Trasfontao inauguran hoxe o seu proxecto de agrocultura. As portas da Gargalleira estarán abertas dende as 17.00 horas e o evento comezará as 18.00. Os asistentes poderán gozar de servizo de barra e petiscos. Todo elo baixo unha singular jaima que acollerá as iniciativas culturais desta parella.
A inauguración, que terá lugar na finca da Gargalleira (Trasfontao), comezará cun evento denominado Escrita en directo. Esta actividade lírica estará encabezada por cinco poetas: María Lado, Lucía Aldao, O Leo, Daniel Landesa e Silvia Penas.
Para comezar realizarase un primeiro recital, no que cada poeta entoará un par de pezas para os asistentes. Ao rematar, os escritores trasladaránse a unhas mesas para que o público poida encargarlles poemas personalizados que elaborarán durante a tarde. «Os poetas recollerán temáticas dos asistentes para a elaboración dos poemas, que poden estar dedicados a un amigo, un familiar ou mesmo a un namorado», conta Llerena.
Mentres os poetas elaboran as súas composicións personalizadas, o evento estará amenizado polo son das artistas e activistas culturais As Efémeras. Este grupo de música procedente de Redondela, que fusiona música tradicional con actual, está encabezado por Olga Nogueira. No remate da súa actuación, os poetas recitarán as composicións que lle foran encargadas previamente polo público.
Ademais, na Gargalleira contan na carpa con unha biblioteca. Nela hai caixas con libros nas que a xente poderá realizar intercambios literarios. Nestas caixas predomina a poesía, a literatura galega, o ensaio, a literatura feminista e narrativa latinoamericana do século XX.
Esta é a primeira das moitas actividades que se van realizar na finca de Trasfontao. Entre as temáticas que predominarán atopamos cursos e talleres de artes escénicas e plásticas. Tamén seguirán a celebrar eventos e encontros culturais, musicais e literarios. «No futuro realizaremos máis cursos, talleres e eventos» afirma Llerena sobre as previsións para a finca silledense, que aposta pola cultura e tradición galegas.
Para poder asistir ás actividades programadas na Gargalleira será necesario facer unha reserva, xa que hai un control de aforo polas medidas covid. O importe da reserva será testemuñal e a entrada será «a billeteira inversa». Isto quere dicir que o importe decidirao cada asistente ao rematar o evento, segundo valore a súa experiencia.
O nome da finca ten varios significados, entre eles «manancial» e «terreo con gromos de carballo». A Gargalleira ten río, mananciais soterrados e carballos gromando a cada paso. Foron terras do pazo de Trasfontao, que se atopa ao leste do prado. A familia rematou por vendelas e, tras pasar por varias mans, acabaron nas de Llerena e Andrés. Así comeza a ser un espazo adicado á cultura do apego á natureza e a tradición.