?n golazo de Marcos, que colou o esférico por toda a escadra desde a frontal da área rival, sentenciou no minuto 70 o derbi que Callobre e Sporting Estrada dirimiron onte no feudo do primeiro. Como soe ser habitual nestes partidos de máxima rivalidade, o fútbol foi pouco vistoso. E diso beneficiouse o Sporting, que impuxo o ritmo que máis lle conviña contaxiándollo ao seu adversario. Así o recoñeceu tralo partido o técnico do Callobre, José Rivadulla: «Non saímos nunca da súa presión. Contaxiámonos do seu fútbol directo. Nunca soubemos manexar o partido». Rivadulla, que criticou a falta de tensión dos seus rapaces, pensa nembargante que «foi un partido de 0-0». Apreciación que non comparte o seu homólogo no banquiño sportinguista. Pitu valoraba onte o 0-1 como o «xusto resultado dun encontro no que tivemos máis ocasións de gol». Pesie ás diferencias de criterio, Rivadulla aledouse de que «o resultado foi bo para o fútbol estradense. Agardo que lle sirva para algo ao Sporting».