O cadro roxinegro tan só foi quen de gañar en dúas das súas sete visitas ó Ponte en Terceira Ó igual que hai dúas semanas en Verín, Acevedo víuse na obriga de conovocar a tres xuvenís
26 abr 2003 . Actualizado a las 07:00 h.A participación do Club Deportivo Lalín na fase de ascenso á Segunda División B dependerá en grandísima medida da súa actuación nos dos vindeiros partidos de Liga. O de esta tarde contra o Ponte Ourense e o do vindeiro xoves, na casa, ante o seu único rival polo cuarto posto de promoción, o Rápido de Bouzas. Esta é a crúa realidade dun equipo que deixou fuxir entre os dedos numerosas ocasións para certifica-lo seu pasaporte para o voo do ascenso. Por iso, hoxe só vale gañar no Municipal de Oira (17.30 horas) . Sen necesidade de lembra-la súa pobre bagaxe na segunda volta, con só 20 dos 42 puntos en xogo sumados, o Lalín ten un compromiso francamente complicado. Por varios motivos. O primeiro, a súa praga de baixas. Sen Willi e Diego, no dique seco desde hai meses, Acevedo acumula para o choque de hoxe as ausencias de tres dos seus puntais. Álvaro na defensa, Manu no centro do campo e Felipe na dianteira. Os tres sancionados. O primeiro, por ser expulsado a pasada semana ante o Alondras, e os outros dous por acumulación de tarxetas amarelas. Deste xeito, o técnico roxinegro víuse na obriga de convocar, coma hai dúas semanas ante o Verín, a tres xuvenís. Os centrocampistas Iván e Javi López, que repiten, e o defensa Rubén. A tradición tampouco axuda ós dezaos, que en Ourense perderon cinco dos seus sete partidos co Ponte en Terceira División, ante un equipo hoxe asentado na oitava posición da táboa a once puntos do Lalín. Se a iso se lle engaden a rapidez e calidade do plantel ourensán e o seu terreo de xogo, de herba artificial e de dimensións non demasiado amplas, todo fai pensar en que os de Acevedo deberán apliacarse ó máximo para saca-los tres puntos de Oira. O empate a 2 no partido da primeira volta no Cortizo apunta na mesma dirección.