Heredeiros da Crus anuncian a marcha de seu vocalista Javi Maneiro e cancelan os seus próximos concertos

Javi Maneiro, vocalista de Heredeiros da Crus e unha das súas figuras máis recoñecibles, decidiu poñer fin á súa etapa na banda galega. A formación confirmou a noticia e admitiu atoparse nun momento de «profunda conmoción» pola decisión do cantante e frontman. A primeira consecuencia foi cancelar as actuacións previstas no Inverfest o 31 de xaneiro e no Exporock o 14 de marzo, ademais de deter todas as negociacións en marcha para os directos do ano 2026. Aínda que no comunicado non se fala expresamente de separación, o grupo sinala que non pode ofrecer máis detalles e que o futuro de Heredeiros da Crus permanece «aínda por definir».

No texto distribuído por DotBeat, a empresa que os representa, Heredeiros da Crus quixeron destacar «o talento, a enerxía e a personalidade» de Maneiro, calidades que —aseguran— deixan «unha pegada profunda na banda, nos escenarios e en cada unha das persoas» implicadas no proxecto. A formación agradeceu de maneira expresa o camiño compartido durante estas décadas e desexoulle «o mellor nesta nova etapa» que agora inicia. O comunicado péchase cun «Sempre, Heredeiros», unha mostra da intensidade do momento que vive unha das bandas máis emblemáticas do rock galego.

La Voz púxose en contacto tanto con Javi Maneiro como cos representantes da formación para aclarar os motivos da decisión e os plans da banda, sen obter resposta.

Heredeiros da Crus, nados en Ribeira en 1992, convertéronse nun caso único do rock en galego grazas á súa mestura de enerxía, humor e retranca. O seu impacto transcendeu o ámbito musical, ata o punto de se transformar nun auténtico fenómeno social, cando miles de mozos os tomaron como ídolos pola súa proximidade e descaro. Chegouse a dar a situación de que algúns profesores de galego se sorprendían ao escoitar o alumnado falar coa meiga xeada e o seseo característicos que o grupo popularizou nas súas cancións.

A súa primeira etapa, que vai do 1992 ao 2007, deixou discos emblemáticos como A cuadrilla de Pepa a Loba (1994), Está que te cajas (1996) e Des minutos (1997), ademais dunha chea de himnos que marcaron unha xeración. Tras unha pausa, regresaron no 2012 con éxito, publicando Jard Rock con Fé (2013) e Derretidos (2016), e mantendo unha intensa actividade en directo ata a actualidade.

Paralelamente, Maneiro desenvolveu unha traxectoria persoal, principalmente co seu proxecto Jabón Blue, no que explorou un rock máis melódico e introspectivo con discos como La música va por dentro (2006), By the white (2008), Flores en la carretera (2010) e Niña de las manos frías (2012). Tamén publicou música baixo o seu propio nome en traballos como Acaricia mis arrugas (2019) e Palabras de un desconocido (2020). Ademais, colaborou con diversos artistas galegos, converténdose nunha voz singular dentro da música actual do país.

En agosto do 2022, Maneiro sufriu un accidente cerebrovascular en directo. Tras sentirse indisposto e padecer fortes dores de cabeza, foi trasladado ao hospital, onde un TAC revelou un vaso sanguíneo roto. Ingresou na uci do Hospital Clínico e a banda suspendeu todas as actuacións ata a súa recuperación. Daquela experiencia naceu Un bonito despertar (2023), o seu último disco en solitario, cuxo título alude ao seu regreso á escena. «Non escoitara o meu corpo e deume unha labazada, tiven a sorte de renacer», explicaba nunha entrevista en La Voz. Sobre a súa recuperación engadía: «Estou adestrando a voz cunha logopeda, practicando atletismo e facendo rehabilitación vestibular. Quero chegar en forma ao escenario».

A volta aos escenarios con Heredeiros da Crus materializouse en xuño do 2023 cando Maneiro volveu a actuar con eles en Ourense.

---

---

---