Cunqueiro e Valle-Inclán


É ben sabido que don Ramón María del Valle-Inclán pasou o derradeiro treito da súa vida en Compostela, onde cumpriu 68 anos o 28 de outubro de 1935 e onde finou o 5 de xaneiro de 1936. Nese tempo, toda a Galicia cultural xirou sen parar arredor del, nunha mostra de recoñecemento intelectual simplemente incomparable. E un dos que andaba por alí era un mozo de vintepoucos anos que se chamaba Álvaro Cunqueiro e que comparecía daquela coma un fervente e ilusionado galeguista.

Cunqueiro foino visitar un día en Santiago e explicoulle que eran parentes lonxanos polos Montenegro de Cambados. Mais o creador dos esperpentos non acababa de dexergar claramente aquela relación familiar. O rapaz de Mondoñedo explicoulle entón que súa avoa paterna, Carmen Montenegro y Barcino, que vivía en Fefiñáns, era prima carnal da nai de don Ramón, que se chamaba Dolores de la Peña y Montenegro.

Tivo que abordalo outro día no Café Derby, onde don Ramón departía co doutor Devesa. O mozo de Mondoñedo describiu aquel momento coas seguintes palabras: «Achegueime a don Ramón respectuoso e emocionado. Recibiume, creo eu, cunha punta xentil de ledicia no dicir e no mirar, preguntoume por meu pai e polos meus tíos, e como o doutor Devesa me titulaba de poeta, interesouse polos meus versos. Varios días acompañeino en breves paseos pola Alameda e ata o sanatorio do doutor Villar Iglesias. Tiña, véxoo ben agora -dixo-, unha grande e saborosa ira civil, chea de togada dignidade; era dos que, para facer xustiza, póñense primeiro da parte da liberdade».

Cunqueiro recoñeceríao despois, inequivocamente, coma o escritor que máis influíu nel e sentenciou: «Do que, por escrito, eu teña aprendido doutros escritores , a maior parcela do ensino é a súa». E sempre o tivo o xenio mindoniense pola «máxima figura das letras en castelán desde don Miguel de Cervantes, outro fidalgo manco e desventurado, ata este día». É curioso que poucos estudosos de Cunqueiro se teñan detido ante unha seria consideración desta realidade tan atraínte e tan digna dunha reflexión analítica.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Comentarios

Cunqueiro e Valle-Inclán