Xosé Manuel Sarille reúne os seus artigos feministas en «A causa das mulleres»

Recompila un cento de textos publicados entre os anos 2004 e 2019

Sarille escribiu os artigos recompilados no libro entre os anos 2004 e 2019
Sarille escribiu os artigos recompilados no libro entre os anos 2004 e 2019

redacción / la voz

«O feminismo, os valores femininos, masculinos e algúns máis, convencionalmente moi próximos, son temas recorrentes da miña actividade xornalística», escribe Xosé Manuel Sarille (Lugo, 1956) na introdución a A causa das mulleres (Candeia), un volume que recolle un cento deses artigos feministas, escolmados dos textos que escribiu entre o 2004 e o 2019 en diversos medios. Uns contidos e reflexións que seguen a ser pertinentes, arredor dunha causa que o autor relaciona co avance social: «O feminismo analiza, cuestiona e reformula o xeito de relacionarse, de amarse, de vivir. Afortunadamente é así», escribe. E unha causa que non deixa indiferente, como cidadán e tamén como articulista: «Como non me vai interesar algo que atinxe de xeito directo á metade da poboación do mundo?», pregúntase.

Neses textos abórdase a causa das mulleres, como xa deixa claro o título, en toda a súa diversidade, dende unha ollada que combina o local co universal, dende Galicia a Afganistán ou Brasil, así como o histórico e o máis apegado á actualidade. Pero, se hai un tema recorrente, ese é o da prostitución e a trata de mulleres. «A trata, a explotación, está na cerna da prostitución, que se basea no comercio de mulleres», denuncia Sarille, quen cre que moitas veces é unha cuestión que non se aborda en toda a súa complexidade porque interfire «un problema de clase social», algo que tamén acontece, observa, coa inmigración ilegal.

Neses dous decenios de xornalismo xurdiron noticias ou situacións que actúan a xeito de fitos para analizar a marcha da reivindicación dunha igualdade plena. E a escolma de textos tamén serve para botar a ollada atrás e observar temas ou áreas nas que se viviron acontecementos decisivos: dende o movemento MeToo ao pulo do deporte feminino, dende a sentencia da Manada ao caso Weinstein. Aí están artigos, por exemplo, como o titulado Piraguas, escrito a partir da negativa a que unha parella mixta puidese inscribirse como K-2 nunha competición oficial. Ou a súa achega a Elisa e Marcela, antes de que a película de Isabel Coixet popularizase e espallase a súa historia.

Sarille, consciente da complexidade dos asuntos que aborda nos artigos, non refuga de cuestións como poden ser as denuncias falsas por maltrato, que prexudican ás vítimas directas e ás que sofren a violencia, aínda que sen esquecer que «iso non debe agochar que o verdadeiro drama, no que cómpre actuar, é a evidencia de que moitas mulleres padecen esa violencia», matiza.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
1 votos
Comentarios

Xosé Manuel Sarille reúne os seus artigos feministas en «A causa das mulleres»