Asturies


Sempre que vou a Asturies, que acostuma a ser con frecuencia, síntome como se non saíra de Galicia, e é lóxico pola grande similitude: a orografía non varía demasiado e a vexetación é practicamente a mesma, porque o clima, se non entramos en grandes detalles, é moi parecido.

O verde predomina e entra con descaro no mar, os vales son profundos e a sensación de espazo das paisaxes de interior sobrecolle e emociona. As montañas, das que poden gabarse arreo, son espectaculares, maxestosas, e imprimen carácter, porque trazan con contundencia unha paisaxe que sen dúbida inflúe no comportamento e a actitude das xentes que habitan eses territorios.

Do occidente máis próximo, con tradicións e fala similares, ata o oriente xa lindando con Cantabria, Asturies é unha terra espectacular cunha historia admirable e con xente orgullosa de seu, capaz de amosalo sen complexos. In situ coñecín a cultura da sidra e a súa importancia, na que converten unha humilde bebida tradicional de orixe milenaria nun símbolo de identidade do que se gaban e polo que loitan, dende hai anos, para que sexa declarado patrimonio inmaterial da humanidade do mesmo xeito que a fascinante arte prerrománica asturiano, xa recoñecida dende 1985 pola Unesco.

Asturies, terra irmá con tradicións semellantes ás nosas, onde a mitoloxía representada por xanas, trasgus, cuelebres ou nuberus crea un vencello directo co mundo celtoatlántico, e as súas músicas, coas antigas e espectaculares tonaes de gaita e voz, o Pericote de Llanes, o Corri-Corri de Cabrales, as danzas primas ou as muiñeiras son outro dos trazos identitarias incuestionables.

Pero quizais o máis importante sexa a lingua, pola que moitos asturianos e asturianas loitan dende hai anos a prol da súa oficialidade, xente coa que me sinto identificado por reclamar algo lexítimo que debería ter o recoñecemento institucional que lle corresponde por ser un importante patrimonio, igual que a variante do galego falada en toda a franxa occidental desta querida e admirable terra irmá.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
16 votos
Comentarios

Asturies