A vellez e a morte


A nosa cultura fala máis da idade que da vida, quizais porque todos desexamos chegar a vellos aínda que sexa negando selo, é dicir, sen aceptar que se estea xa nese espazo da retirada sen volta. Quizais por iso moitos rexeitan ter chegado xa aló.

Grandes escritores dedicaron sisudas reflexións a esta parte da vida. Pitágoras, Cicerón, Sófocles, Cervantes, Shakespeare, Quevedo, entre os de antes. Nietzsche, Poe, Kafka, Hemingway, Faulkner, Unamuno ou Antonio Machado, entre os máis próximos. Todos ollaron a vellez cara a cara, descubrindo tamén as súas vantaxes. Porque, como dixo o propio Unamuno, «nunca un home é demasiado vello para recomezar a súa vida, e non temos que buscar que o que foi lle impida ser o que é ou o que será». O cineasta Ingmar Bergman tamén aportou o seu: «Envellecer é como escalar un monte: mentres se sobe as forzas diminúen, pero a mirada é máis libre, a vista máis ampla e serena». Porque o mozo coñece as regras, pero o vello sabe as excepcións.

Non obstante, a morte é admitida coma ese punto final inexorable da vida. «Así como unha xornada ben empregada produce un doce sono -dixo Leonardo da Vinci-, unha vida ben usada produce unha doce morte». Pero non hai unanimidades neste terreo do insondable. O revolucionario Robespierre sostiña que «a morte é o comezo da inmortalidade», mentres que Mario Benedetti reducíao a que, «despois de todo, a morte e só un síntoma de que houbo vida». A actriz Marlene Dietrich, desafiante e altiva, preguntaba e respondía: «¿Medo á morte? Un debe temer a vida, non a morte».

Logo están os sabios que aprenderon a ollar o horizonte sen inquedanzas. Francis Bacon dicía que meditara moito sobre a morte e que atopara que era «o menor de todos os males«. Tolstoi aseguraba que «a morte non é máis ca un cambio de misión». O Nobel portugués José Saramago afirmaba que «non me preocupa a morte: disolvereime na nada». Moito antes ca eles, xa Confucio sentenciara que «se aínda non sabemos que é a vida, ¿como pode inquedarnos a esencia da morte?». Miles de anos de culturas e civilizacións aínda non abondaron para fixar a relación entre o ser humano e o seu final. E aí seguimos.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
10 votos
Comentarios

A vellez e a morte