«Asasinato no Consello Nacional», que se publicará en setembro, rende homenaxe a Vázquez Montalbán
21 ago 2010 . Actualizado a las 02:30 h.Alberte Cupeiro. Este é o novo detective privado que se suma á cada vez máis ampla nómina de investigadores privados da literatura galega. Cupeiro é o encargado de investigar o Asasinato no Consello Nacional (Xerais), título da nova novela que Diego Ameixeiras (Lausanne-Suiza, 1976) presentará o vindeiro mes de setembro. «Estou un pouco sorprendido pola expectación diante deste novo libro, pero tampouco ten nada tan especial; supoño que será o habitual cando alguén saca unha novela», afirma o escritor en Ourense, a cidade pola que se move habitualmente Horacio Dopico, o outro detective creado polo escritor.
Cupeiro «é moi distinto a Dopico, investiga outro tipo de intrigas, un mundo de política ficción e aquí a trama é máis real, máis pegada á actualidade». Entre as características do novo personaxe literario salienta que practica a meditación oriental e interésalle «o taoísmo e o budismo; é moi calmado, xa que se sitúa nun plano superior ao resto da xente e só lle preocupa a busca espiritual, ademais de intentar resolver o caso».
O caso é nada menos que o asasinato dun dirixente do BNG cando sae dunha reunión do Consello Nacional. A novela é «unha clara homenaxe a Vázquez Montalbán», autor dunha novela negra publicada en 1981 que levaba por título Asesinato en el Comité Central (Planeta), na que nunha reunión rutinaria do PC español apáganse as luces e aparece morto o seu secretario xeral; a investigación corre a cargo do comisario Fonseca, designado polo Goberno, e de Pepe Carvalho, o detective creado por Montalbán que cumpre aquí o encargo do PC.
