O Concello da Coruña homenaxea ás cantareiras cunha ampla programación polas Letras Galegas
A CORUÑA
María Pita acollerá un acto de homenaxe ás sete mulleres homenaxeadas este ano o venres 16 de maio
30 abr 2025 . Actualizado a las 17:16 h.O Concello da Coruña presentou este mércores a súa programación especial para celebrar o Día das Letras Galegas 2025, dedicado ás cantareiras, figuras esenciais na transmisión da cultura popular galega. A alcaldesa, Inés Rey, destacou que «desde o Concello celebramos este recoñecemento a mulleres que durante xeracións foron transmisoras da nosa lingua, cultura e historia colectiva a través da música».
O programa, que decorrerá do 3 de maio ao 14 de xuño, inclúe máis de vinte actividades que se desenvolverán en distintos espazos da cidade. A homenaxe céntrase en sete mulleres recoñecidas pola Real Academia Galega: Adolfina Casás, Rosa Casás, Eva Castiñeira, Manuela Lema, Teresa García Prieto, Prudencia e Asunción Garrido. Moitas delas tiveron unha ligazón vital coa cidade e coas súas tradicións musicais. Entre os actos máis destacados está a Festa das Letras, que encherá A Coruña de música, teatro e danza galega do 16 ao 18 de maio. Os xardíns de Méndez Núñez, a praza do Humor, Campo da Leña, San Andrés e outros espazos acollerán foliadas, actuacións teatrais, pasarrúas e concertos con artistas e agrupacións como Treixadura, Belém Tajes, Zavala, Ulex, Breo, Carabela, Eris Mackenzie, Cántigas da Terra, Donaire, Xacarandaina, entre outros. Tamén haberá unha gala especial polo 70 aniversario da A.F. Aturuxo no Teatro Rosalía de Castro.
O domingo 25 de maio celebrarase na Fundación Luís Seoane unha conversa sobre as cantareiras homenaxeadas, coa participación de investigadores, artistas e familiares. A mesma xornada contará cunha intervención musical a cargo do dúo Casás&Barcia. A programación inclúe ademais exposicións, andainas culturais guiadas por Xurxo Souto, espectáculos infantís do programa Apego, o concurso de música tradicional Xacarandaina e un concerto de Xosé Lois Romero e Aliboria dentro do ciclo AgoraSón. «O saber destas mulleres non está nos libros, senón na memoria compartida e nas palabras cantadas», lembrou Inés Rey, quen subliñou que esta programación busca recuperar esas voces e recoñecer a súa contribución á identidade galega.