«Que pobreza de Goberno, tiña tantos aliados... e agora cos presupostos saíronlle revirados»
VIMIANZO
A REGUEIFA DA SEMANA, POR LUPE BLANCO | Esta é a súa particular análise da actualidade destes días. Dende a política ata o cocido: ¡todo vale para regueifar!
17 feb 2019 . Actualizado a las 05:00 h.Aquí vamos coa regueifa,
pois prestádeme atención,
que xa dixo Pedro Sánchez
que vamos ter eleccións.
Que pobreza de Goberno,
tiña tantos aliados
e agora cos presupostos
saíronlle revirados.
Revirados e mangantes,
rastreiros e condenados,
son os que se aproveitaron
de dous discapacitados.
O conto non é de fóra,
que ocorreu en Vimianzo
por parte de dous contratistas
e os que traballan no banco.
Iso si que ten delito,
que a regueifa aquí non cale,
aproveitarse de xente
que ten discapacidade.
Que teñan bo escarmento,
que devolvan o diñeiro,
e se queren vacacións
que os leven para Teixeiro.
Voume relaxar un pouco,
que aínda é moi cedo,
falemos de algo de moda,
como é a pataca e o grelo.
Porque chega o entroido,
e o cocido é desexado,
o que pasa é que o produto
cada día vai máis caro.
A cousa é delicatessen,
niso doulle a razón,
se van caras as patacas
imaxínate o lacón.
Os que andan moi contentos,
e o mérito hai que darllo,
son os que fan a campaña
de «Eu quero a Carballo».
Son un pouco conapeiros,
todo sexa dito de paso,
a próxima que argallen
será de bicos e abrazos.
Eu acabo coa regueifa,
porque teño que acabar,
para a semana que vén
heivos volver cantar.