Carlangas ou Coco María son algunhas das propostas musicais. Todo, do 4 ao 7 de decembro
25 oct 2025 . Actualizado a las 00:41 h.O festival Comarea de Muxía xa ten cartel completo para a súa edición do 2025, do 4 ao 7 de decembro. Bonita & Sabrosa, Carabela, Carlangas, Coco María, Raz & Afla, Zars B, Antela, Balklavalhau, Pulpiño Viascón e Skanderani Band son as dez propostas, concertos nalgúns casos gratuítos e noutros de pago. Estes últimos concentraranse na xornada do domingo 7, no cámping-Lago Mar, e serán os de Bonita & Sabrosa —dúo de DJ—, Carabela —revelación da nova música galega—, Carlangas —recoñecido vocalista e guitarrista de Novedades Carminha—, Coco María —auténtico fenómeno mexicano—, Raz & Afla —unha versión moi propia do Afro House— e Zars B, produtor e DJ. As entradas sairán á venda este próximo luns, 27 de outubro, a partir das doce da maña.
De par da música, o Comarea, impulsado dende a cooperativa xuvenil Horta Creativa, incluirá tamén faladoiros, obradoiros e outras actividades en distintos espazos da vila. Foi no 2015 cando iniciaba a súa andadura, co ánimo de desestacionalizar o ocio e de apostar pola cultura no rural, buscando «unha experiencia integral».