A regueifa da semana | Di Lupe Blanco: «Terán que protestar, xa está todo preparado, porque o médico dos fillos, lévanllo para outro lado»
07 jul 2018 . Actualizado a las 05:00 h.Moi bos días para todos
a ver se hoxe calibro
que estamos de noraboa
por ter a Praza dos Libros.
E houbo boa pregoeira
que a Sés nunca se engaña
veulle dar a apertura
a labrega bergantiñana.
E se vas mercar un libro
escoitade o que canto
tamén levas de agasallo
unha lata das de Calvo.
Ai a cousa está bonita
que o importante éche ler
pero tamén é boa cousa
que nos dean de comer.
Que nos dean de comer
xa din que nos dan a lata
e aló en Coristanco
nós pedimos un pediatra.
Xa o fixeron en Malpica
que foron a protestar
pois os pais de Coristanco
quérense manifestar.
E terán que protestare
xa está todo preparado
porque o médico dos fillos
lévanllo para outro lado.
Pois vou seguir cantando
que xa nos saíu o sol
e esta noite por Carballo
tamén é o Festifolk.
Vai habere foliada
xa o digo de primeiro
que vai dar gusto a praza
con tantísimo gaiteiro.
E disque van actuare
que iso si me gusta moito
para dar a despedida
veñen os de Milladoiro.
Quero mandar un saúdo
que a cousa está ben sabela
para os que che andan sen luz
esa xentiña da Grela.
Eu xa vou ir acabando
porque algo aprendín
que se falo da corriente
igual ma cortan a min.