Chicharrón volve cunha «Postal» en galego

A banda carballesa lanzou onte o seu segundo disco, que será presentado mañá en directo no Pazo da Cultura

Ferrero, Gende, Vecino e Trigo, onte na presentación do novo disco de Chicharrón.
Ferrero, Gende, Vecino e Trigo, onte na presentación do novo disco de Chicharrón.

O grupo carballés Chicharrón está de volta co seu segundo disco. Alberto Vecino, Diego Gende -presentes ambos na presentación de onte-, Mar Catarina, Xurxo Meis e Rubén Domínguez proseguen con Postal pola senda do pop alternativo independente -producen Mar e Rubén a través do seu propio selo, Prenom-, pero con varios cambios significativos: as guitarras acústicas deixan paso ás eléctricas; os son máis «primitivos e viscerais» a outros «máis doces e pulidos», e o castelán é substituído polo galego.

«A lingua galega ten unha relación moi estreita coa musicalidade, ten moito potencial lírico e iso é algo que se ve nas cancións», explica Gende sobre este cambio co que esperan contribuír a normalizar a presenza deste idioma na escena do pop independente. «A musicalidade do galego -apunta tamén Vecino- é moitísimo máis ampla que a do castelán, temos máis vocais, é máis fermoso e por iso se leva usando na poesía a no arte desde o século XII».

Vecino, ex integrante de Franc3s, era o autor dos temas do primeiro disco -de feito a maioría foran compostos antes de formarse Chicharrón-, pero o compoñente coral prima nesta Postal, cuxo título tamén ten a súa explicación: «No primeiro disco partiamos de que estabamos perdidos e atopabamos o camiño e neste disco avanzamos, sabemos que estamos no noso camiño e facemos unha parada para contarlle á xente que queremos e que nos quere o que estamos vendo», conta Vecino.

O público carballés será o primeiro en poder gozar en directo deste traballo, posto que Chicharrón presentarao mañá no Pazo da Cultura (21 horas, 2 e 3 euros) cun concerto organizado en colaboración co Concello: «As Administracións poden ser como os elementos químicos; neutralizadores, retardadores, catalizadores... e eu creo que un concello o que debe procurar sempre é catalizar, provocar que as capacidades creativas da xente que reside alí se aceleren», explicou o alcalde, Evencio Ferrero na presentación do disco e o concerto, acto no que tamén lembrou como Andrés do Barro foi quen de acadar o éxito cantando en galego.

«Para nós é unha honra que Chicharrón presente o seu disco aquí e esperamos que a xente lle guste tanto como o primeiro», explicou o edil de Cultura, Marcos Trigo.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
2 votos
Comentarios

Chicharrón volve cunha «Postal» en galego