José Carballido lidera unha banda que lanza o seu primeiro disco, «I», este 1 de maio, e da que tamén forma parte o director do mesmo colexio larachés, José Roca. Un proxecto musical totalmente en galego
01 may 2023 . Actualizado a las 01:37 h.Voan entre ceos de ouro os sorrisos que xogan coma nenos nunha rocha fronte o mar
[A flor e a mañá, A Sombra dos Soños]
Hai xa tempo que a José Carballido o teñen catalogado como «o profesor rockeiro de Caión». Docente de música no centro educativo desta localidade da Laracha, elixiu un día sinalado, 1 de maio, para lanzar o seu novo proxecto. E non está só, porque nesta aventura na que toman o nome de A Sombra dos Soños e na que el asume composición, arranxos, voz e guitarras, faise acompañar doutros catro músicos coruñeses cos que tocara xa anteriormente en Requiem ou en Khitara: Diego Lestón (batería), Daniel Añón (guitarras), Lalo Carnota (baixo) e José Roca (teclados), este último por certo non só docente, senón director do mesmo colexio, o CEIP de Caión.
A Sombra dos Soños é o primeiro proxecto totalmente en galego de José Carballido. Logo da saída de catro sinxelos, este luns 1 de maio publícase o primeiro disco, I, en todas as plataformas dixitais. Gravado nos estudios Diquesí, recolle 14 pezas que se moven entre diferentes estilos de rock e metal, mais con influencias variadas: dende o rock setenteiro ata o folk galego, con pingas progresivas e mesmo acústicas. Sinte a brisa, O emigrante namorado, As tebras malvadas e A flor e a mañá, as catro pezas dispoñibles ata o de agora, evidencian o compás deste disco: textos predominantemente intimistas, afondando na alma humana dende diferentes puntos de vista co fin de entender e analizar un mundo que, non obstante, nunca é sinxelo de comprender.
José Carballido é licenciado en guitarra polo Conservatorio da Coruña, rematando o grao superior de guitarra con Ramón Carnota como mestre e sumando formación de man de prestixiosos guitarristas e compositores. Acadou no 2002 o primeiro premio no concurso Aguillolo Rock e o segundo no festival da Canción de Ordes, no 2003, en ambos casos como cantante, compositor e guitarrista do grupo Mízar. Integrou outras formacións como Piazzolla, Dezine ou Aeternam. Foi no 2011 cando estreou a súa obra Requiem, para grupo de rock progresivo e coro clásico, por diversos teatros de Galicia. Este disco, publicado por Musea Records, foi nominado aos premios ProgAwards. Chegado o 2016, suma un EP de pezas propias co grupo Khitara, banda integrada por dúas guitarras clásicas, dúas eléctricas, caixón flamenco e voz. Todo este abano de composición e interpretación é algo que Carballido compaxina co seu traballo como docente, tendo liderado proxectos que trouxeron felicidade para o colexio caionés, tales como os dous premios no certame Quero Cantar.
Nada de sombrío nin de escuro ten A Sombra dos Soños. Que pode saír mal se non houbo día de curso escolar no que Carballido non entrase no colexio cun saúdo alegre e a asubiar... ¡Abertas as contratacións!