Carballo: A Regueifa da Semana

 Empezamos ben o ano,

que xaneiro vén moi quente,

non polas temperaturas,

senón polo presidente.

Goberno moi progresista,

a ver se non o fan mal.

O que xa estou desexando

é a reforma laboral.

Ou iso é o que dixeron,

paréceme que o sentín.

Iremos analizando

se cumpren ben o que din.

Vouvos resumir o conto,

pero fágoo regueifando:

mentres metade aplaudía

outros taban rabeando.

Vendo ese panorama

cada un da súa maneira,

pensei en Blanco e Calviño:

parecía unha regueifa.

Houbo boas ocorrencias

que quitaron da cabeza,

pero gañou a esquerda,

para eles a boneca.

Non foi do agrado de todos.

Algún non lle viu a gracia,

pero isto é o que pasa

nun país de democracia.

Non me dan pena ningunha

os que tan alí sentados,

só o probe de Néstor Rego

que disque foi obrigado.

Falaron da monarquía,

que levou unha ovación,

pero creo os tres reis

repartíronlle carbón.

Non vos botedes ó monte,

as cousas pouco cambiaron,

nun día cos comunistas

aínda non nos expropiaron.

Pois pasaron cinco días

e xa lle rezan a un santo,

tade tranquilos veciños

que aínda hai cartos no banco.

Vamos a ver o que pasa

co goberno progresista,

espero ver máis cultura

ca que ten un culturista.