Os outros turistas


Agora que o número de turistas comeza a baixar imos comezar a ver un tipo de visitantes que non entra nas estatísticas oficiais da Xunta nin de Turespaña; é moi posible que ninguén saiba como definilos pero están aí. O lugar ideal para velos é Baroña, mellor nun temporal de inverno, neses momentos nos que parecería incrible que alguén se achegara ata o castro. Son homes e mulleres solitarios que camiñan entre as pedras, ou pola ribeira. É posible que eles mesmos, dúas horas antes, nin se imaxinaban que estarían chimpando entre laxes, ou mollando a punta dos zapatos coa fría auga.

A poderosa forza icónica do castro de Baroña, da praia do Vilar, ou de Balieiros, atrae a todo aquel que precisa ordenar a cabeza, ceibarse dunha situación de estrés, decidir que facer ante un problema (a parella, emigrar, unha discusión familiar). E buscan na natureza brava da nosa costa, nos cantís solitarios e sen paseos marítimos, un espazo confortable para atopar respostas que están case sempre dentro deles mesmos.

Non son turistas, claro, son viaxeiros, que é cousa distinta. E aquí temos unha das máis fermosas virtudes da nosa comarca, e se cadra a máis secreta, a que ninguén pon por escrito: a capacidade de axudar a sandar a mente e o corazón, de ser un refuxio de solitarios que saben que para calmar os trebóns do interior, ás veces é preciso envolverse dos temporais do mundo aberto.

O mellor é que preservar esa virtude e a nosa sona é moi doado e barato: tan só se trata de non lles molestar.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
5 votos
Comentarios

Os outros turistas