Que llo pregunten aos alcaldes das vilas centrados en escribir cartas aos Reis Magos, remitidas a Santiago, A Coruña, Madrid, Bruxelas solicitando servizos, nalgúns casos repetidos en anos anteriores, e non atendidos
05 ene 2026 . Actualizado a las 05:00 h.Esta noite os Reis Magos entrarán nos fogares barbanceses, tamén nos de Noia, Outes, Lousame, Mazaricos e Muros, para cumprir os desexos dos nosos nenos e nenas, escritos en papel branco cun lapis vermello, o máis acaído para este labor, e remitidos nun sobre de diferentes cores para que voen nese avión de soños por cumprir.
Noite para algúns máxica, ao comprobaren como se cumpriu todo o escrito; e non tanto, para aqueles aos que non se lles completaron, ao cen por cen, as peticións realizadas. O primeiro choque coa dura realidade. Unha cousa é ao que aspiras e outra é o que podes lograr.
A imaxinación debuxa ilusións e estas atraen a felicidade cando se cumpren, pero provocan desesperanza cando non se concretan. Que llo pregunten aos alcaldes das vilas nas que vivimos, sempre centrados en escribir cartas aos reis magos, enviadas a Santiago, A Coruña, Madrid, Bruxelas, para mellorar a vida dos seus veciños, solicitando servizos, nalgúns casos repetidos en anos anteriores e non atendidos, xustificados con desculpas baleiras.
Pero aínda así non se quebra a ilusión do servidor público, que insiste diante dos seus aparatos administrativos para continuar elaborando informes, estudos, propostas, para que o rei mago correspondente inclúa nos orzamentos anuais da súa Administración, xa por cansazo, a petición formulada.
Estamos na metade da lexislatura e este é o momento para que as cartas se atendan; se non, as mocións de censura non serán máis que papel mollado.