Cardeñosa: «O compromiso marca a diferenza»

O técnico do Abanqueiro analizou os detalles do progreso dun proxecto chamado a construír o gran filial do CD Boiro


Ribeira / la voz

Capitán e peza clave no CD Boiro de Luís Santiago, esta tempada, José Manuel Rodríguez, Cardeñosa (A Pobra, 1986), non afronta só o reto de volver a poñer ao bloque de Barraña onde se merece, tamén traballa por darlle un futuro ao club. O central está ás rendas do Abanqueiro de Segunda Galicia, que este ano acolle o proxecto para construír o gran filial do primeiro equipo boirista.

-Como valora o inicio do proxecto co Abanqueiro, tanto de cara a avanzar no filial como nos resultados deportivos?

-Estamos moi contentos cos rapaces e coa forma de traballar, sobre todo nos adestramentos. En canto aos partidos, de momento só perdemos un na casa e fomos bastante superiores aos rivais, pero si que nos está custando. Esta é unha categoría complicada, con moitos campos de terra. En días de moita chuvia, pasámolo mal para levar adiante determinado tipo de encontros.

-Hai diferenzas entre prepararse co Abanqueiro ou con outro?

-Este non é un adestramento dun equipo de Segunda Rexional. A calidade, o ritmo, a asistencia, o propio escenario do campo e os recursos dotáronnos de valor. É dicir, todo o que fai falla para dar un salto, pero en realidade, o compromiso marca a diferenza. Estou a falar da predisposición dos xogadores, para min, a clave. Se non fose así non me tería embarcado dende o comezo neste necesario proxecto.

-Cal é o obxectivo real que hai detrás dese «necesario»?

-O obxectivo primordial é sacar aos rapaces. Ser unha ponte para que o día de mañá todos podamos ver un Boiro con xente da casa, que pasou previamente polo Abanqueiro. Non buscamos tanto o ascenso de categoría, senón amosarlle o que é o fútbol aos rapaces.

-Pero a táboa está apertada e deixan moi boas sensacións.

-Está claro que se traballas e o fas ben vas estar arriba, pero ascender depende doutras cousas. Sinceramente, nós non estamos pensando na categoría na que estamos. Aínda así, oxalá que para o ano puidéramos estar en Primeira [Galicia], para mellorar máis a competitividade do equipo.

-Hai homoxeneidade na metodoloxía de adestramentos?

-Dende a EFM Concello de Boiro estase sempre co seu correspondente adestrador e cada un pode ter certos matices, pero todos levamos unha idea de xogo global; tratar ben o balón.

-Xa nutriron as filas boiristas.

-Xa debutaron Brais Nieto, Carlos Silva e Diego Rivas, que adestran habitualmente co primeiro equipo, como antes o fixeron Anthony, Dani Silva ou Néstor. Por exemplo, hoxe [polo día de onte] tamén veñen adestrar cinco ou seis co primeiro equipo. A realidade é que rapaces que viñan de Terceira Rexional están a sorprendernos. Temos unha media de 21 anos de idade e penso que todos eles teñen condicións para chegar lonxe. E se non é co Boiro, xogarán en equipos de categorías máis altas.

-Falemos de rivais.

-A categoría non me sorprendeu en canto ao nivel, pero si que me parece máis complicado do que, a priori, pensabamos. Conxuntos como Taragoña, Cabo, Calo ou Lesende van a poñernos as cousas moi difíciles.

 

Curta e ao pé 

Un xogador: Mauro Silva.

Un estadio: Riazor.

Un gol: O de Donato para ganar a liga 1999-2000.

Un adestrador: O xogo de Guardiola, o carácter de Simeone e o talante de Valverde; imposible quedarme con un.

Un ídolo: Carles Puyol.

Unha película: Braveheart.

Un lugar: Nemiña.

A súa comida favorita: Ameixas á mariñeira de mamá.

Un soño: Traballar no fútbol profesional.

Un equipo de lenda: España 2008-2012.

Outro deporte: Ciclismo.

Unha canción: Sultans of swing, dos Dire Straits.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
6 votos
Comentarios

Cardeñosa: «O compromiso marca a diferenza»