Feo, baixo e gafudo


Os espartanos tiñan o costume de arroxar dende o cume do monte Taigeto as persoas nadas con algunha discapacidade coa saudable finalidade de evitar que a súa fermosa e próspera civilización fora deslucida pola presenza de individuos con diversidade.

Hai algo máis de tres décadas, nos centros de educación pública de Galicia comezáronse a aplicar os primeiros plans experimentais de integración dos rapaces e rapazas que, ata aquel momento, eran excluídos dos contextos educativos ordinarios. Lembro que un dos principais obxectivos daqueles deseños era acadar a tolerancia presencial deste novo alumnado. A cidadanía, sobre todo a adulta, non estaba aínda afeita a atoparse coa rapazada afectada con síndrome de Down, autismo ou parálise cerebral sen incorrer nun inicial rexeitamento ou evidente incomodidade.

Por fortuna, o tempo e a constancia, lograron mudar aqueles anquilosados esquemas e hoxe en día o que era excepción converteuse en algo cotián e eticamente lexítimo. Sen embargo, de súpeto, xorde Greta Thumberg. Con estupor e tristeza contemplo o ignominioso espectáculo da execución pública que dende moitas e sisudas tribunas, se fai sobre esta moza. Obviamente podemos concordar ou non coas súas ideas e mesmo rebater a súas teses, pero reprobala ou desmerecela especificamente polo seu aspecto físico, pola súa vestimenta ou por padecer síndrome de Asperger, aflíxeme como persoa, abáteme como profesional e desacóugame como cidadán.

Visto o visto, pode que sexa o momento de retroceder séculos, volver a trepar aos acantilados do Taigeto e arroxar dende alí a todos os maricóns, aos coxos, aos mongólicos, aos sudacas, aos negros, aos xitanos, aos cegos, aos travelos, aos gordos, ás marimachos…

Publicamente declaro a miña máis firme e lúcida determinación de que voluntariamente quero ser incluído no lote dos imperfectos. Non desexo, en absoluto, formar parte dunha flamante e segregacionista elite de auto-elixidos. Aínda que eu tampouco o merezo: son feo, baixo e gafudoOlegario Sampedro. Ribeira

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
50 votos
Comentarios

Feo, baixo e gafudo