Miguel Silva: «Unha lingua non ten por que ser bonita, unha lingua ten que ser útil»

O rianxeiro aposta pola inversión en produción cultural para o fomento do galego

a. l.
ribeira / la voz

Hai veces nas que un repentino cambio de dirección che sitúa no camiño correcto. Namorado da música dende pequeno e graduado en Lingua e literatura galegas dende setembro, Miguel Silva decidiu, dun día para outro, utilizar YouTube como ferramenta na que mesturar as súas dúas paixóns: o canto e a produción da cultura galega. Baixo o pseudónimo de Aquel-e, o rianxeiro elaborou vídeos en lingua galega de importante repercusión, os cales mostran o seu ton reivindicativo, como son Havana feat Rosalía de Castro, O galego fermoso (e o que non o é tanto) ou Orghullo de ser.

A súa versión da canción de Camila Cabello, Havana, foi un éxito co que o rianxeiro non agardaba chegar a tanta xente. Substituíndo a letra orixinal polos poemas de Rosalía de Castro Pra a Habana! e Adeus ríos!, Aquel-e creou un tema que o levaría á televisión: «Primeiro chamáronme da radio e fixéronme algunha entrevista. Eu quería dar o salto tamén á tele, pero non esperaba a chamada do Luar, unha institución da cultura galega. É unha mostra de que non teñen medo a renovarse. Foi unha experiencia incrible. Tratáronme moi ben».

 Afastado desa temática, O galego fermoso (e o que non o é tanto) deulle a Silva o premio Eficiencia Comunicativa de Youtubeiros. En soamente tres minutos de vídeo deixa unha mensaxe moi clara: «Transmito algo que me parece inxusto. Empresas que non falan galego en todo o ano e que, de repente, chega o 17 de maio e fártanse a facer anuncios sobre a morriña, o luscofusco, os bicos... Utilizando as palabras máis bonitas do galego. Unha lingua non ten por que ser bonita, unha lingua ten que ser útil».

O seu último gran proxecto, Orghullo de ser, veu da man do Concello de Rianxo. Nel, Miguel Silva lanza unha mensaxe de apoio á comunidade Lgtbiq: «É un tema complicado. Queda moito por avanzar. Hai que ir rompendo a imaxe dos xéneros pechados. De se es home tes que ser así e se es muller tes que ser doutro xeito. Primeiro iso e despois xa faremos unha reflexión máis ampla. Hai nenos e nenas que están pasando verdadeiros calvarios».

Entretemento en galego 

Nos últimos anos, o número de galegofalantes caeu en picado. O consumo de música, literatura e televisión en galego seguen a mesma dirección. Nos inicios da súa canle, Silva topouse cunha carencia moi importante que, para el, é clave: «Fixen uns vídeos sobre a cultura trash galega, que vén sendo a cultura de fácil consumo, como son algúns tipos de literatura ou de televisión. Non a producimos e é máis necesaria do que parece, pois facilita o contacto diario co galego. Quixen recordar personaxes de éxito como Ana Kiro ou Andrés do Barro. É unha base que necesitamos».

Precisamente esta cultura trash, ou pop, ocupaba o día a día da xeración do rianxeiro, que vía en programas como o Xabarín club ou Pratos combinados un estandarte da cultura galega: «A miña xeración contaba cunha programación moi adaptada aos canons televisivos da época. Ver a Shin Chan, aos personaxes de Bóla do dragón ou a Miro Pereira falar en galego creábache un sentimento de identidade co que os rapaces de hoxe en día non contan».

A pesar do nomeado éxito desta programación, Silva non cre que a solución sexa a volta á pantalla destes contidos, senón que é necesaria unha forte inversión en nova produción cultural: «Podemos seguir gozando destes contidos na TVG á carta. Agora, precisamos de programación actual. Hai que buscar novas fórmulas que enganchen á xuventude para non perder o uso da lingua, a nosa particular maneira de ver o mundo e a nosa cultura».

Salto aos escenarios. No futuro, o rianxeiro Miguel Silva fundamentará a súa canle na cultura pop, producindo dun xeito máis profesional diferentes estilos musicais, como o «trap» ou o propio pop. Ademais, ten previsto ofrecer directos na rúa e en salas habilitadas, co monólogo e a música como principais protagonistas.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
10 votos
Comentarios

Miguel Silva: «Unha lingua non ten por que ser bonita, unha lingua ten que ser útil»