Unha romaría con moito sabor galego

Música, literatura, traxes tradicionais e obradoiros foron algunhas das actividades que realizou o centro educativo de Escarabote con motivo do Días das Letras

.

Ribeira / la voz

O mes de maio é por excelencia o mes da cultura galega, e por iso onte o colexio de Escarabote vestiuse de gala para acoller un gran número de actividades que converteron as instalacións educativas nunha verdadeira romaría das letras. O equipo de Normalización Lingüística, en colaboración con todo o claustro de mestres e coa asociación de nais e pais de alumnos, organizou un completo programa que incluíu dúas exposicións: unha dedicada á protagonista deste ano do Días das Letras Galegas, María Victoria Moreno, e outra sobre traxes rexionais.

«Dúas das mamás, Andrea Romero e María Treus, deixáronnos un total de sete traxes e, ademais, impartiron un obradoiro de baile tradicional e outro de fabricación de monteiras, que é o gorro do traxe de home», apuntou a directora do centro boirense, Xoana Maneiro. Ademais, tamén houbo talleres de percusión a cargo dun gaiteiro de Nebra, un grupo da asociación Ambar deu clases de cestería e a propietaria da Soqueira do Petón falou do seu traballo.

Carácter rotatorio

Os alumnos do centro de Escarabote -un total de 165- puideron participar en todas as actividades, «porque eran obradoiros simultáneos e ían rotando», destacou Maneiro, que tamén explicou que, a partir da unha, as portas do centro abríronse para que os pais puideran sumarse á romaría.

«Un grupo de persoas da asociación Ámbar fixeron a performance Arte en movemento, e ademais actuaron as pandereteiras As da Canteira, que son da asociación de pais, e os rapaces do taller de percusión fixeron un espectáculo movendo uns monicreques que lle chaman Monifates», enumerou a directora, que cualificou a celebración dun éxito e xa pensa en ampliar o número de actividades de cara ós festexos do ano próximo.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
1 votos
Comentarios

Unha romaría con moito sabor galego