«O teatro non só require diálogo, tamén precisa moita mímica»

Leva un ano dirixindo a compañía de Porto do Son


ribeira / la voz

Hai pouco máis dun ano, a raíz da precipitada marcha de Manuel Mariño, Baldomero Iglesias púxose á fronte da compañía de teatro afeccionado Queixumes. Só levaba un par de anos na agrupación sonense, pero tiña táboas nas artes escénicas, pois desde a década dos noventa forma parte da formación do Liceo de Noia. Este domingo, el e o seu elenco de actores presentarán na casa de cultura de Portosín Melocotón en almíbar, unha peza que, asegura, gustará moito ao público.

-¿Como entrou a formar parte da familia de Queixumes?

-Pois foi Manuel Mariño e os propios compoñentes do grupo os que falaron comigo para ver se me interesaba sumarme. A min gustábame o teatro e xa estaba na compañía do Liceo noiés, así que, aceptei.

-Tamén foron os membros do grupo os que o propuxeron como director...

-Pois si. Despois de que se fora Manuel Mariño tivemos unha reunión para analizar o futuro da compañía e propuxéronme a min como director.

-¿Que o levou a asumir ese reto?

-Foi precisamente o feito de velo coma un reto, coma unha experiencia nova. Agora sei que foi unha decisión acertada, porque me gusta dirixir.

-¿Que é o que máis lle atrae desta tarefa?

-Gústame, sobre todo, meterme cos compoñentes do grupo, darlle ordes, corrixir aqueles aspectos que penso que son mellorables, como a forma de falar ou de expresarse mediante os xestos. O teatro non só require diálogo, tamén precisa moita mímica.

-Pero, ¿algo complicado terá tamén o traballo de dirixir?

-Para min, o máis complicado é a escenificación. Aínda así, teño aos compañeiros da agrupación que teñen coñecementos e experiencia na materia, así que me botan unha man.

-¿Pensa entón seguir unha boa tempada na dirección de Queixumes?

-Si, de feito temos xa outra obra na man e empezaremos cos ensaios xusto despois da representación do domingo. O certo é que estou moi emocionado co teatro.

-¿Trátase tamén dunha comedia?

-Si, vai ser unha comedia. En algunha ocasión analizamos a posibilidade de representar un drama, pero o público, cando vai ver unha representación teatral, quere rir, pasalo ben.

-¿Iso pretende Queixumes con «Melocotón en almíbar»?

-Pois si. O domingo, os veciños van rir e van ver un grupo de teatro totalmente renovado, pois eu deille outro aire. Penso que é unha compañía xeitosa.

-¿Hai actores ou custa formar un grupo mínimo para representar as obras elixidas?

-Custa traballo xuntar xente. Hai quen ten gañas, porque eu véxoo, pero non se deciden a dar o paso. Penso que é unha cuestión de vergoña. Non se deciden a dar o paso e é unha mágoa, porque se podería facer outras obras que requiren máis xente.

baldomero iglesias garcía director de queixumes

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos

«O teatro non só require diálogo, tamén precisa moita mímica»