Vilaxoán e Mecos regresan á auga levando máscara

Os clubs arousáns confían en poder adestrar sen o complemento desde a vindeira semana


Vilagarcía / La Voz

«Se non nos deixan baixar o luns á auga, coa entrada da nova normalidade, cando nos van deixar?». Por fortuna, a pregunta ao aire que lanzaba Gelo Tarrío o pasado sábado mentres daba por feito o reinicio dos adestramentos na nova semana non terá que ser respondida. Onte á tardiña tanto a traíña do remeiro e presidente do C. R. Vilaxoán como a do veciño C. R. Mecos saían ao mar tras tres meses no dique seco, portadas polos seus xogos de trece remeiros e mailo patrón. Todos eles con cadansúa máscara axustada á cara. Un complemento do que, ao contrario que os remeiros de Euskadi e de Cantabria, de volta aos adestramentos de equipo no seu medio natural desde sete días atrás, non puideron desprenderse nin unha vez comezaron a vogar, portándoo en todo o tempo de traballo cos compañeiros de bancada.

Así, informa Gelo Tarrío, quedou establecido no protocolo que a primeira hora da tarde lles chegaba aos clubs galegos de remo desde a Secretaría Xeral para o Deporte, o salvoconduto necesario por parte da desde a semana pasada autoridade competente na regulamentación das condicións de adestramento e de competición de nivel autonómico en Galicia. Tanto Gelo Tarrío como Martín Rodríguez Prol, adestrador da traíña do C. R. Mecos, coincidían en que a obriga de adestrar con máscara non é un problema nesta primeira semana, por canto todas as tripulacións dedicarán as súas primeiras sesións conxuntas a series de fondo, a «coller un pouco de tacto coa auga. 18-20 padas por minuto, non imos facer nada extraordinario, o equivalente a unha persoa andando pola rúa», explica o vilaxoanés.

Á espera do protocolo definitivo

Pero unha vez que se supere esta breve fase de reencontro coa auga, «no momento no que busques velocidade», con adestramentos de intensidade, «a máscara é infumable», advirte Gelo Tarrío. Na mesma liña, Rodríguez Prol salienta que o protector facial é un elemento «que deberiamos evitar» unha vez que as traíñas comecen a apertar o ritmo a vindeira semana. «Supoño que así como vaian pasando os días quitarannos a obriga das máscaras», comenta o adestrador do C. R. Mecos. A Secretaría Xeral para o Deporte quedou pendente de aprobar un protocolo definitivo para o remo na nova realidade en vigor desde onte en Galicia. Nel -dan por descontado os clubs- suprimirase o uso da máscara.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Comentarios

Vilaxoán e Mecos regresan á auga levando máscara