A directiva presentarálles aos socios do Xuven un orzamento para saldar a débeda nun ano

pablo penedo VILAGARCÍA / LA VOZ

AROUSA

MONICA IRAGO

Baloncesto Os responsables do club ofrecerán mañá na asemblea as contas da entidade ao detalle. Finiquitados os pagos ao último plantel

10 ago 2018 . Actualizado a las 05:00 h.

Os 551 socios do Club Xuventude Baloncesto terán mañá, a partir das 12 no Pavillón do Pombal, a oportunidade de coñecer polo miúdo o estado da contabilidade da entidade que preside Toño Lema. Será dúas semanas despois do que querían boa parte do medio cento de socios presentes na asemblea do 28 de xullo, na que lle reclamaran sen éxito a Lema un exercicio de transparencia explicando a orixe e a contía de cada partida de ingresos e de gastos que levaron o mandatario a anunciar unha débeda de 34.070 euros. A insistencia dos copropietarios do club forzou entón a convocatoria dunha nova xuntanza do seu órgano soberano, a asemblea.

Regístrate gratis y recibe cada mañana en tu correo las principales noticias del día

O director deportivo e directivo do Xuven, Manu Felpeto, adiantaba onte que «a documentación que solicitaron os socios está preparada» para a súa explicación, e para a entrega dunha copia a quen a solicite mañá. Mais non será este o único documento económico co que acuda a directiva ao seu segundo encontro cos socios en dúas semanas. Os responsables da entidade presentarán ademais a súa proposta de orzamento para a vindeira tempada. Unha folla de ruta elaborada «con previsión de liquidar a débeda nun ano». Iso, engade Felpeto, «se se cumpre a previsión de ingresos», feita xa sobre unha base «non especialmente optimista». A directiva resérvase os números para a cita de mañá.

Dentro dese orzamento 2018/19 inclúense os 5.900 euros de débeda co primeiro plantel da pasada tempada, a última na LEB Prata, que veñen de ser aboados, informa o director deportivo do Xuven.

A nivel deportivo, a directiva procedeu a solicitar na Federación Galega unha praza na Primeira Autonómica para o seu agora único equipo, unha categoría por enriba da que disputou o filial o curso pasado, e unha por debaixo da EBA que lle correspondería tras o descenso do plantel de LEB Prata. A praza en EBA segue pendente da resolución do recurso do Xuven por un CSD que dispón de 3 meses para emitir o seu fallo.