Asmubal e Rasoeiro, xa só pode quedar un

O gañador hoxe no pavillón de Coirón debería entrar na liguiña de acceso á promoción á División de Honra B Feminina


vilagarcía / la voz

A Primeira Autonómica Feminina, a máxima categoría galega, arrincaba a presente tempada co aliciente de ver fronte a fronte a dous equipos do Salnés. Ao Rasoeiro sumábase o Teucro-Asmubal, un conxunto este xurdido da unión de media ducia de balonmanistas do club pontevedrés, catro séniores meañesas, e outras tantas xuvenís da entidade de Coirón, ás que esta última tiña especial interese en ir curtindo máis aló das ligas de formación. Hoxe, na cancha do Teucro-Asmubal (20.15 horas), os dous equipos xogaránse o todo polo todo, co gañador clasificándose virtualmente para a liguiña de acceso á promoción á División de Honra B, limitada aos catro mellores da Primeira Autonómica e aos dous da Segunda. E co perdedor condenado a penar o resto da campaña nunha fase de permanencia costosísima en materia de desprazamentos.

A falta do encontro de hoxe e do da derradeira xornada, o Teucro-Asmubal é terceiro da Primeira Autonómica con 16 puntos, polos 14 do Meloxeira Rasoeiro, quinto. O conto é que a vindeira semana o Teucro-Asmubal deberá visitar a cancha do líder, un Porriño B que conta por vitorias os seus doce partidos de Liga precedentes. Ao cadro grovense, pola contra, tócalle recibir o Tui, sexto e antepenúltimo con tres triunfos e nove derrotas. O Caselas, cuarto en discordia con 15 puntos, visitaba na noite de onte precisamente o Tui, para completar o calendario en sete días recibindo o pechacancelas, Xiria. E ningún dos adestradores do Salnés confía en que falle.

O meco Víctor Garrido vive a súa terceira tempada á fronte do Asmubal. A derrota co Caselas hai sete días fíxolle pasar o seu equipo do pase virtual á fase pola promoción a depender do que aconteza hoxe, porque en Porriño «contamos con perder», di. Sen a lateral dereita Paula Rey, lesionada o 30 de decembro, opina que as claves dun hipotético triunfo local pasan por «sabernos repregar fronte ao seu bo contragolpe, e defender ben o dous para dous coa súa pivote, Uxía».

Pablo Filgueira, técnico do Rasu, xoga sen a súa extremo dereita Andrea Barreiro, lesionada hai un mes para o resto da tempada. Filgueira apela á liña ascendente do seu equipo, e á recarga física durante a minipretempada navideña para superar a un rival do que salienta o xogo coa pivote e a finalización das súas extremos.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Comentarios

Asmubal e Rasoeiro, xa só pode quedar un