O domingo, en Burgáns, Juventud Cambados e Unión Grove disputarán o primeiro dos dous derbis arousáns da Primeira Autonómica 2011/12. Un duelo de rivalidade entre dous conxuntos en moi diferente estado de necesidade.
Paradoxalmente, o máis necesitado, o Juventud Cambados, chegará ao choque co ánimo algo máis elevado logo da estrea con éxito de Neno Millán á fronte do seu banquiño. O pasado domingo, no campo do Sporting Marín, o adestrador accidental do cadro arousán cumpría con nota o seu primeiro exame capitaneando o primeiro triunfo amarelo desde a xornada de apertura da Liga e tras outras dez de sinsabores. O resultado, 2-3.
Foi este un desenlace agónico, co Juventud Cambados xogando con tan só 13 efectivos do primeiro plantel tras a marcha do equipo de Beni, de Ramón e de Nico. Este último, para enrolarse no Vilanova. Fran foi baixa por sanción, e Iván por lesión de última hora. Ata o segundo porteiro, Rubén, entrou no minuto 89 como xogador de campo para gañar tempo en substitución de Jiménez, o home do partido e autor do 1-1, antes do descanso, e do 1-2 (min 55). Pénjamo marcou o 1-3 a un cuarto de hora do final, pero o Cambados, que puido chegar á segunda parte cunha goleada a favor, rematou pedindo a hora.
O cambio de actitude do plantel amarelo, con todos os seus homes implicados ao cento por cento, foi tan importante coma o resultado.
Pola súa banda, o Unión Grove confirmou o seu estancamento tras o seu grande inicio de Liga cun empate a uns na casa. Claro que co líder, o Moaña, coma rival, nun choque igualado. Dúas derrotas e un empate é a serie aberta do Unión.