Tal e como se prevía, a traíña de Mecos quedouse sen a cuarta praza da clasificación final da Liga ACT, o seu obxectivo para as dúas derradeiras regatas da competición regular, disputadas esta fin de semana en augas vascas e cántabras. A penalización o pasado sábado co último posto da proba de Bermeo por un suposto bloqueo ilegal á embarcación de Pedreña deixaba a cuarta praza da xeral a 11 puntos, os que separaban os remeiros grovenses dos de Castro. Era preciso entón que a traíña cántabra rematara última o domingo na Bandera Villa de Noja, e que Mecos gañase a proba. Os galegos foron quintos (18.01.89) e os de Castro, sextos (18.03.08). Urdaibai rematou por levarse o preciado título de mellor traíña de España ao imporse na derradeira cita da Liga regular con catro segundos de vantaxe sobre Astillero: 17.38.29 fronte a 17.42.30. Hondarriba foi terceira, tanto da regata (17.52.93) como da xeral, e Orio cuarta en Noja (18.00.39), quedándose a 2 puntos de arrebatarlle a Castro o mesmo posto. Cabo de Cruz, que chegaba á última fin de semana de competición no quinto lugar da xeral, afundíuse e, co oitavo tempo en Bermeo e o undécimo en Noja, rematou sétimo empatado a puntos con Mecos. Esta fin de semana os clubs da ACT porán fin á tempada coa celebración do play-off .