O grupo Formato Verde/TNL instalará 97 colectores de alta capacidade de compactación dotados cun sistema global de comunicacións.
07 dic 2010 . Actualizado a las 14:25 h.O grupo Formato Verde/TNL, con sede no Parque Tecnolóxico de Galicia, resultou adxudicatario da implementación do novo sistema de recollida de residuos na capital dos Emiratos Árabes, mediante a instalación de 97 colectores de alta capacidade de compactación dotados cun sistema global de comunicacións.
Esta adxudicación comezou a xestarse no ano 2008, cando Formato Verde foi a empresa elixida polo concello de Abu Dhabi mediante un concurso de ideas para mellorar o impacto visual dos colectores na cidade, rebaixar os custos da recollida e reducir as consecuencias sobre o tráfico que producían os camións de lixo diariamente. A solución proposta pola firma galega estaba baseada no seu produto máis evolucionado, o BigTainer, un equipo que permite compactar até 20 metros cúbicos de residuos sólidos, reducindo así o número de descargas e eliminando o impacto estético dos grandes colectores en superficie.
Esa experiencia inicial do concurso de ideas derivou nun primeiro contrato para instalar dez puntos de recollida en zonas estratéxicas da cidade. O seguinte paso consistiu en convocar un concurso para transformar todo o ciclo de recollida nesta urbe de case 1,9 millóns de habitantes, na que a media de produción diaria de residuos urbanos é de 2,2 quilos por persoa (o dobre que en España). As bases establecían que os grupos aspirantes deberían propoñer técnicas e solucións similares ás da experiencia piloto desenvolvida con Formato Verde e de novo impúxose a tecnoloxía galega.
Na actualidade, esta empresa completou a instalación de 51 dos 97 colectores Big Tainer contratados. Un deles está situado ao pé da maior mesquita do Golfo Pérsico. Nesta fase do proxecto traballan técnicos desprazados por Formato Verde desde as súas dúas sedes -Ourense e Porto-, con apoio de empresas locais do ámbito da construción.
Recarga de coches eléctricos e wifi
A adxudicataria do servizo do lixo en Abu Dhabi solicitoulle á empresa galega unha mellora sobre o Big Tainer convencional. Esa modificación consistiu en adaptar os puntos de recollida a necesidades futuras, como conexións para a recarga de coches eléctricos, Internet wifi, cámaras de seguridade, displays e espazos publicitarios. Outra mellora está ligada ao acabado estético. Ao redor das caixas de correos dos autocompactadores poden despregarse marquesiñas con parasois e con vaporizadores de auga para axudar aos usuarios do transporte público a soportar as elevadas temperaturas.