A ampliación da autoestrada en Chapela afectará a 200 leiras e obrigará a trasladar un colexio

Chapela é unha parroquia fragmentada en porcións trazadas con tiralíneas polas infraestruturas. Autoestrada, ferrocarril e estradas fórona cuarteando. Pero Fomento quere outro pedazo de torta para repartilo entre os automobilistas.

O Ministerio e o Plan de Estradas de Galicia prevén ampliar a entrada a Vigo por autoestrada e duplicar esta vía de alta capacidade entre a ponte de Rande e a entrada a Vigo en Teis. Neste barrio vigués a ampliación só será dun carril en cada sentido.

Os veciños de Chapela están en garda fronte á futura ampliación da autoestrada ao seu paso pola parroquia. Onte a comisión de afectados celebrou unha asemblea informativa para dar a coñecer como afectará a construción de catro carrís máis ao seu paso por Chapela. Douscentos leiras serán invadidas polo asfalto e o colexio de Iglesia terá que mudarse de lugar.

Os afectados contan co apoio do propio concelleiro de urbanismo, Emilio González, que vive na parroquia e sofre nas súas carnes os prexuízos dunha obra destas características.

Barrios

Francisco Puch Casal e outros membros da denominada comisión de afectados, como Alberto Martins e Carlos Rodríguez Villamarín sinalan que a ampliación suporá que á maioría dos expropiados pola construción no seu día da AP-9 volverán ser prexudicados.

A futura obra pública afectará á avenida de Redondela, o barrio de Iglesias , Riofrío, Cidadelle e Angoren.

A ambos os dous lados da autoestrada producirase unha nova afección de cen metros. Neses cen metros non se puiden volver construír. Dentro destas marxes quedarán o pavillón de deportes, o instituto de ensino secundario, o centro de saúde, o templo parroquial e ata o cemiterio.

Francisco Puch Casal, un dos membros da comisión de afectados sinala que non entende a ampliación da autoestrada porque a futura construción da A-57 vai eliminar moito tráfico de entrada á cidade. Precisamente a A-57 tamén teñen unha forte contestación no municipio.

Segundo Puch, o ensanche da autoestrada non vai resolver o problema do tráfico. Hoxe día a circulación xa é moi densa e diariamente pasan polo tramo de Chapela uns 60.000 vehículos ao día. Cando se produce un accidente ou unha avaría na ponte os atascos son quilométricos. O futuro está negro, de alcatrán. O tren de proximidade é unha quimera e os barcos que cruzan a ría xa se achan en perigo de extinción.