Os sete grandes concellos, coa excepción de Santiago, están por debaixo da media no uso da lingua
LUGO CIUDAD
Os sete grandes concellos, que suman algo máis dun terzo da poboación de Galicia, están por debaixo da media no emprego habitual do galego. Na Coruña, Ferrol, Lugo, Ourense, Pontevedra e Vigo as porcentaxes dos que empregan máis castelán ca galego ou castelán só son maioría. A excepción é Santiago, onde os galegofalantes suman algo máis do 52% da cidadanía. No lugar contrario sitúanse Ferrol, cun 81% que optan polo castelán -o 43% fálano habitualmente e o 38,4% emprégano con máis frecuencia que o galego-, porcentaxe que seguen de preto Vigo (74%) e A Coruña (72%). En Vigo atópase un 12,9% de persoas que din que non entenden nada o galego. Por tanto, o territorio das grandes urbes segue a ser lugar de expresión maioritaria castelá.
No conxunto da comunidade, o 49% dos galegos fálanlle sempre en galego aos fillos, un dato que hai que relacionar co feito de que é a familia unha das principais vías de aprendizaxe da lingua, xunto coa escola no caso do tramo de idade de entre 5 e 29 anos. O 29% dos galegos, 20 puntos porcentuais menos, falan cos seus fillos sempre en castelán, un dato que reforza a preferencia do galego no ámbito doméstico.
Interlocutores
De feito, a enquisa do IGE tamén consultou sobre os hábitos lingüísticos dos galegos en función dos seus interlocutores. O galego é a lingua máis empregada cos amigos (55%) e no comercio (52%). A porcentaxe baixa lixeiramente con respecto ao trato con persoal da Administración (51%) e da banca (50%), pero descende cando se trata de relacionarse con médicos (48%) ou cos profesores dos fillos (43%).
Algo semellante ocorre no ámbito laboral: nas relacións horizontais o galego ten un lixeiro predominio (52%) que se modifica nas verticais: o 52% prefiren o castelán nas comunicacións co persoal ao seu cargo, porcentaxe que sube ao 55% cando se trata de falar cun superior. Na relación cos clientes existe un certo equilibrio, xa que o castelán é empregado polo 52% neste tipo de conversas.