O ex alcalde carballés non tivo morriña da política activa. Non lle gusta mirar atrás e, se o fai, é só para non repetir erros
18 jul 2009 . Actualizado a las 02:00 h.Polo momento, remataron as vacacións e tamén a «tranquila» vida como mestre no instituto Monte Neme de Carballo para Manuel Varela Rey. Dende o mércores, o ex rexedor da capital de Bergantiños exerce o seu novo cargo como xefe territorial de cultura e turismo. Este posto sitúao no mesmo lugar que ocupou os últimos catro anos Milagros Lantes. A nacionalista foi delegada territorial de cultura e deporte durante o goberno bipartito.
-¿Por que tomou a decisión de aceptar o cargo e volver así á vida política en activo?
-A verdade é que me propuxeron varios cargos de responsabilidade e ademais creo que teño certa obriga coa xente que mo ofrecía. Finalmente aceptei con toda a ilusión en moitas ganas, para ser un colaborador deste goberno.
-Vostede foi asesor de Núñez Feijoo cando era conselleiro de Política Territorial. ¿Influíu o actual presidente da Xunta nesta toma de decisión?
-É posible que si. En todo caso, manifestoume en algunha ocasión o seu desexo de contar comigo nalgúns temas e en cargos de responsabilidade.
-¿Botou de menos o feito de ocupar un cargo público ao estar fóra da política?
-Non. Cada un ten que ir cumprindo etapas. Estiven vinculado moito tempo á política local. A partir de aí xurdiron outras situacións e dediqueime á miña actividade profesional como mestre. Cando estou nun posto concreto, o que procuro é volcarme nel. Non penso nunca no que pasou antes, ou case nunca. Simplemente o fago como aprendizaxe ou como parte da miña historia, pero nada máis. Se agora estou aquí, na xefatura territorial de Cultura e Turismo é para facer o mellor posible o meu traballo e sen pensar no de atrás.
-¿Cales serán os seus retos neste novo posto?
-Debo ter en conta todo aquilo que lle é propio á consellería que dirixe Roberto Varela. A miña responsabilidade vai ligada a dous sectores. Por un lado, está a cultura e todo o que signifique a súa creación, difusión e a conservación do patrimonio. O Camiño de Santiago é o eixo cultural da nosa provincia. Pero creo que o máis importante é lograr que o individuo sexa activo e logre canalizar a súa sensibilidade sobre este eido. Neste sentido, dende a xefatura territorial, debemos a favorecer que se desenvolvan esas canles. A segunda parte do meu labor está enfocada á ordenación e promoción do turismo. O principal reto é ofertar e ofrecer o mellor de nós, dende o punto de vista do visitante e tamén dende o económico. Hai moita xente que pode, que debe e que ten que vivir da explotación do sector turístico tan variado que temos en Galicia.
-¿En que situación se atopa a Costa da Morte en canto ás materias nas que vai operar?
-Temos a vantaxe de que hai un gran tecido asociativo cultural. Ten que existir a colaboración das agrupacións e os concellos con este organismo para levar a cabo moitas actividades. Temos tamén moi importantes aspectos de patrimonio e en canto ó turismo, esta costa ten uns valores naturais e paisaxísticos únicos. O mar é sempre un elemento positivo, e máis no noso caso. O peixe e o marisco atrae ó turismo cada ano.
-¿E cales son os principais obxectivos na zona?
-A cultura é máis importante cando ti participas, porque a vives doutra maneira. Polo tanto, aí creo que debemos ser sensibles para axudar e colaborar na vida das entidades. Ademais, debemos potenciar os recursos turísticos de costa e interior. O importante é estar preto dos veciños e canalizar as súas inquedanzas. Teño claro que me debo a todos eles.