Percorrer de xeito virtual os principais recursos turísticos cos que conta a comarca de Barbanza ao tempo que se participa nun xogo informático será posible a finais do vindeiro ano. Para entón está previsto que dea os seus froitos o proxecto Travel in Europe, no que está a participar a mancomunidade Arousa Norte en representación de todo o territorio español.
Do que se trata é de colgar na Rede un xogo en tres dimensións que comezará cun mapa de Europa no que aparecerán identificados os destinos que o internauta poderá visitar, é dicir, os quince países que se sumaron ao proxecto. Dentro de cada lugar, o usuario terá a posibilidade de reconstruír aquelas zonas de interese turístico.
No caso de Arousa Norte, os alcaldes decidiron incluír cinco recursos, por considerar que son os piares nos que debe fundamentarse a consolidación de Barbanza como destino turístico. En cada un destes lugares, o internauta terá que superar unha proba.
Polo municipio de Ribeira, a intención da mancomunidade é que no xogo virtual estea presente o parque natural do complexo dunar de Corrubedo e as lagoas de Carregal e Vixán. A proba que se propoñerá aos usuarios estará vinculada coa cidade de Valverde que, segundo unha famosa lenda, está soterrada debaixo dos montes de area.
Literatura e megalitismo
No caso pobrense, o que se pretende destacar a través deste proxecto é o Museo Valle-Inclán e a obra do creador do esperpento. Os boirenses decantáronse por incluír no xogo virtual un percorrido pola ruta das mámoas, co fin de enlazalo coa importancia que ten no municipio a cultura megalítica.
A literatura foi o tema elixido polo Concello de Rianxo para promocionar os encantos da vila a través da Rede. O obxectivo é aproveitar as casas natais de Castelao, Manuel Antonio e Rafael Dieste á hora de deseñar a proba que terán que superar os internautas.
A maiores, a mancomunidade optou por utilizar este proxecto para propoñerlle aos usuarios de toda Europa a realización dunha viaxe virtual pola ría de Arousa e pola infinidade de bateas coas que conta. Deste xeito, co programa Travel in Europe pretende darse un paso máis no intenso labor que está a levar a cabo a entidade supramunicipal para conseguir que o mexillón e a cultura mariñeira se convertan nos principais distintivos de Barbanza.
A inclusión destes cinco espazos no xogo tridimensional conforman a proposta que Arousa Norte exporá na reunión de traballo que esta semana se celebrará na cidade eslovena de Maribor. Ata alí desprazarase Mónica Garrido Silva, técnica de turismo da mancomunidade e responsable do proxecto Travel in Europe.
Dúas xornadas de traballo
Xunto con representantes doutros catorce países da Unión Europea, Mónica Garrido dedicará as xornadas do xoves e do venres a dar novos pasos para a materialización deste orixinal proxecto. As sesións de traballo consistirán na presentación dos lugares de interese turístico que cada un dos destinos participantes pretende incluír no xogo e na exposición de exemplos do que poden ser as probas a superar polos internautas.
No transcurso deste encontro tamén se analizarán cuestións relacionadas coa promoción do proxecto e co seu financiamento, de cara a afrontar a auditoría que realizará a Comisión Europea a mediados deste ano. Para sacar adiante este xogo virtual, os quince países participantes contan cunha subvención concedida pola Unión Europea a través do programa Cultura 2000.
Coa participación neste proxecto, a mancomunidade entra na vangarda das estratexias de promoción do turismo cultural e dá un paso de xigante para divulgar a riqueza da comarca a nivel europeo. O que persegue Arousa Norte é que este xogo sirva para atraer a turistas potenciais. A través de Internet, cidadáns de diferentes países terán a oportunidade de coñecer os atractivos de Barbanza, o que pode animalos a percorrer a zona de forma presencial.
Os principais destinatarios deste proxecto son os estudantes dos institutos e das universidades, aínda que está previsto que, a medio prazo, o xogo chegue ás mans do público en xeral.