Treixadura e Faltriqueira reviven no auditorio a herdanza musical galega

A última hora de onte só quedaban a venda 200 entradas para o concerto que esta noite ofrecerán os grupos Treixadura e Faltriqueira no auditorio. Quen queira asistir aínda está a tempo, polo tanto, de mercar un tique e asistir a este espectáculo que tardará en volverse repetir. A actuación dará comezo ás nove da noite e as entradas custan cinco euros.

Este concerto, co que se revive a herdanza musical galega, inclúese no ciclo Xacobeo Raíces , que conta cun cartel formado por 25 artistas.

Treixadura son quince grandes músicos que compoñen as dúas seccións da formación, os gaiteiros e o orfeón. Logo do éxito acadado co seu último traballo discográfico, Unha semaniña enteira , que levou ao grupo a percorrer nos últimos dous anos boa parte dos escenarios galegos, Treixadura atópase preparando o seu vindeiro disco, Esa si que é muiñada , que suporá o peche da cuadriloxía comezada con Unha noite no muíño .

Treixadura perdeu este ano a un dos seus músicos, Xosé Méndez Martís, Morgan , membro fundador dos Estalotes e compoñente de Cantigas e Agarimos, a quen lle están dedicando este ano os seus concertos.

Os acordes de Treixadura virán seguidos pola polifonía das rapazas de Faltriqueira, que recollen a herdanza das pandereteiras das vilas, fusionando polifonías con percusións e instrumentos acústicos. Teresa, Carolina, María e Ana estarán acompañadas polo acordeón de Jorge Juncal, as percusións de Roi Adro e as cordas de Pascal Gaigne.

Faltriqueira leva percorrido moitos escenarios, dentro e fóra de Galicia, e hoxe subiranse ao do auditorio municipal de Vilagarcía.