A diversión infantil está servida no Multiusos de Sar ate o 3 de xaneiro co variado programa de actividades lúdicas e didácticas que propón a Concellaría de Educación nunha nova edición de Nadalxogo. Non faltan novidades como a que ofrece o Salón do Libro que funciona neste ámbito para a distensión. Son os obradoiros arredor do libro de Jaureguizar Corazón de chocolate , que por un lado xira arredor do mundo Tintimán, coa proxección de peliculiñas de animación na caravana Caixiña de mixtos e facendo eles mesmos personaxes animados, e doutro elaborando corazóns de chocolate comestibles coa axuda de Alba Blanco.
-¿É doado ensinar a facer doces?
-Estes si, porque se fan con biscoitos desfeitos mesturados con nocilla derretida, e un baño final de chocolate. Os pequenos son moi agradecidos e é moi gratificante traballar con eles.
-¿Hai perigos nesta cociña?
-Non, é moi segura. Só usamos un microondas e unha neveira.
-¿Cantos nenos e nenas participan cada tarde?
-Uff!, uns 35 en dúas quendas, ás seis e ás sete, pero a lista cos que se anotan está chea ás cinco da tarde. Temos overbooking de chocolate. Hainos que non perderon ningún. Ate o día 3 vainos haber cada tarde.
-¿Que lles gusta máis do proceso?
-Comer o corazón. Algúns xa queren comelo antes de que estea frío. Tamén lles divirte moito mesturar o biscoito e a nocilla.