Con preto de corenta anos de actividade, Almacenes Eladio está en mans do fillo do fundador quen, por suposto, está feliz e «cheo de orgullo»
23 nov 2008 . Actualizado a las 02:00 h.Almacenes Eladio é un referente do comercio de Padrón. Abriu as súas portas en 1971 na avenida de Castelao coma unha pequena tenda dedicada a droguería e hoxe, tras anos de «moita loita e esforzo», as súas dependencias reservadas a venda ocupan 1.200 metros cadrados repartidos en dous pisos. Para o fundador do negocio, Eladio Cristobo Vicente, é todo un «orgullo» que a actividade que ocupou toda a súa vida profesional teña continuidade nos seus dous fillos.
O maior, Ánxelo Cristobo Angueira, está ao fronte do establecemento de Padrón mentres que súa irmá Ana está no de Santiago, aberto en San Lázaro no ano 1997.
A Eladio énchelle de orgullo ver aos seus fillos no negocio e máis aínda sabendo que «lles vai ben» unha vez que, polo momento, Almacenes Eladio non notou a caída de vendas. Pero hai algo máis que lle satisfai a Eladio e son os premios que recibiu o seu comercio ao longo dos anos, o último en maio pasado en Malta pola imaxe da empresa. Non lle falta, tampouco, a distinción ao prestixio e a calidade e o de excelencia empresarial, entre outros.
A traxectoria deste negocio arranca no ano 1966 en Asados, no municipio de Rianxo, onde Eladio tiña a súa primeira tenda. Escolleu Padrón «para abrir mercado» e a pequena droguería foi medrando ata converterse nos actuais almacéns. Durante moitos anos, Eladio tamén se dedicou a ir de comercial polas tendas, tanto mixtas como do sector, e por lugares moi dispares, de modo que chegaba ata Muros e Cee pero tamén ata a zona de A Estrada e máis. Neses tempos, Eladio coñeceu a moitas persoas e quédalle o grato recordo de que «sempre me trataron moi ben».
Volvendo a vista atrás, hoxe dáse conta de que o éxito do seu negocio estivo no traballo e no esforzo, pero tamén, como di o seu fillo Ánxelo, no saber «adaptarse e dar ao cliente o que demanda en cada momento», de modo que a gama de produtos que vende é amplísima en varios sectores, dende droguería, perfumería, papelería, decoración, horticultura e fitosanitarios. Isto permitiulle, ademais, ter clientes de todo tipo, dende o profesional ata a ama de casa, e tamén de distintas procedencias. A vila representa so o 30% das súas ventas porque, como di Eladio, «Padrón ten que vivir das xentes dos arredores xa que aínda que os padroneses compren na vila todo o que consuman, non da para vivir». Non obstante, segundo engade, isto non é o que sucede xa que, explica, «na maioría dos casos van comprar a lonxe».
Dende 1988, Eladio contou coa axuda do seu fillo Ánxelo que, por entón, acabou a súa etapa na Universidade. Non obstante, o contacto do fillo co negocio viña «de pequeniño». Ánxelo ten fillos, con idades moi curtas polo que é prematuro falar do relevo.