Entrevista | Rocío seoane Presidenta da asociación galega de ergonomía «Ergonomía significa adaptar o entorno á xente»

Previr os riscos derivados do desempeño do traballo diario é o cometido principal dunha disciplina descoñecida para a meirande parte da poboación: a ergonomía. Por iso, os profesionais deste eido decidiron asociarse hai agora un ano e así espallar a mensaxe de que é necesario tomar unha serie de precaucións no lugar de traballo. Rocío Seoane é quen está á fronte deste colectivo.

-Cando se fala de ergonomía, todo o mundo pensa no típico anuncio de cadeira ergonómica.

-Chegou un momento no que ergonómico se converteu nunha etiqueta para vender, pero a ergonomía comeza como unha disciplina na prevención de riscos laborais. Porén, agora converteuse nunha filosofía que busca adaptar o entorno ás persoas e non ao revés. É dicir, buscamos crear lugares usables, confortables e libres de perigo. Acadar este obxectivo implica tocar moitos paus, comezando polo deseño inmobiliario e rematando pola organización do traballo.

-Hai máis ou menos un ano que se creou a asociación. ¿Por que decidistes asociarvos?

-Queremos que a xente coñeza o que realmente é a ergonomía. Ademais, tempos como obxectivo implementar na xente esta conciencia de previr riscos no posto de traballo, así como validar novos xeitos de facer ergonomía.

-¿O voso traballo cínguese unicamente ao aspecto físico?

-Dentro do traballo da ergonomía hai moitas disciplinas. Falamos de saúde ou de biomecánica, pero tamén de psicoloxía, socioloxía ou deseño industrial. Trátase de crear un ambiente de traballo favorable para as persoas.

-¿As empresas están concienciadas na prevención de riscos laborais?

-Están coidando este aspecto moito máis que hai anos. Non ao nivel que os profesionais queremos, pero existen empresas moi concienciadas ao respecto. O problema máis grande é que as empresas non entenden a importancia da formación de base dos traballadores e non se implican neste sentido.

-Comentabas antes que tamén traballades o aspecto da organización do traballo.

-Si. Por exemplo, establecemos definición de funcións, horarios e quendas ou favorecemos a comunicación entre os empregados e os mandos. De todos os xeitos, ás empresas cústalles que alguén de fóra interfira na organización interna das tarefas.