Espíritu olímpico en Marín

Os deuses e heroes clásicos e as competicións deportivas gregas máis antigas ocuparon a escena nas pistas abertas do colexio San Narciso no marco dunha celebración especial organizada polo centro escolar para rememorar as Olimpíadas da idade dourada da Hélade.

O programa comezou cerca das once da mañá e congregou, no espazo deportivo principal do centro escolar, á totalidade dos alumnos -máis de 300-, a profesores e a un numeroso grupo de pais que encheron as gradas e animaron aos participantes. Todos os atletas e gran parte dos profesores e outros alumnos acudiron á cerimonia vestidos con túnicas e vestimentas que reflectían os usos e costumes dos gregos que crearon os Xogos no século octavo antes de Cristo.

Ao desfile dos atletas, entre os que se contaban rapaces de todas as idades e cursos do colexio, seguiu a parte máis cultural da xornada. Os máis pequenos fixeron unha danza cos aros dos Xogos e tamén unha alegoría chinesa, coma homenaxe do centro a sé das Olimpíadas en Pekín no próximo agosto. Para isto último, un grupo de nenos disfrazouse de chineses tradicionais.

As orixes dos Xogos centraron a seguinte parte do programa cunha representación teatral e con animación musical dos mitos nos que se basearon as antigas celebracións gregas. Deste xeito, os rapaces de Primaria e de ESO describiron no escenario o mito de Medea, cunha perfomance, mentres que o de Orfeo e Eurídice fíxose con instrumentos. Os recitados e un barco centraron a historia de Ulises e o teatro de sombras explicou a lenda de Heracles.

A cultura e a mitoloxía deron paso ás competicións. Os mellores deportistas dos cursos de Primaria, ESO e Bacharelato foron os protagonistas de cinco probas, axustadas ás condicións físicas de cada curso, e que foron as máis tradicionais dos célebres Xogos Olímpicos de séculos pasados. Tratábase dunha carreira de velocidade ou de estadio, outra de dólico ou de fondo, ademais de lanzamentos de xavelina e disco. Os nenos tamén fixeron salto de lonxitude.

Despois dunha representación das carreiras hípicas, chegouse á fase final do programa, que se pechou co recitado de poetas como Píndaro ou Sófocles, a colocación das coroas aos vencedores e o baile de danzas mediterráneas.